ഫ്ളോറിഡ് കൊച്ചി സ്വിമ്മാത്തോണ് സംഘടിപ്പിച്ച നീന്തല് മത്സരത്തില് മികച്ച പ്രകടനം കാഴ്ചവെച്ച് എഴുപതുകാരനായ കൊയിലാണ്ടി പെരുവട്ടൂര് ശ്രീരഞ്ജിനിയില് കെ. നാരായണന് നായര് കൊയിലാണ്ടിയുടെ ആവേശമാകുന്നു. ആലുവ പെരിയാറിലെ കടത്തുകടവില് സംഘടിപ്പിച്ച രണ്ട് കിലോമീറ്റര് നീന്തല് മത്സരത്തില് പങ്കെടുത്താണ് നാരായണന് നായര് മികച്ച പ്രകടനം നടത്തിയത്. മത്സരത്തിന് രണ്ട് മണിക്കൂര് സമയമെടുക്കാമെങ്കിലും, ഒരു മണിക്കൂര് ഇരുപത് മിനിറ്റ് മുപ്പത്തി ഒമ്പത് സെക്കന്റ് കൊണ്ടാണ് നാരായണന് നായര് പെരിയാറില് രണ്ട് കിലോമീറ്റര് നീന്തി ഫിനിഷ് ചെയ്തത്.
18 വയസ്സ് മുതല് 74 വയസ്സ് വരെയുളള ഇന്ത്യയിലെ വിവിധ സംസ്ഥാനങ്ങളില് നിന്നും 600 പേര് പങ്കെടുത്ത നീന്തല് മത്സരത്തില് മികച്ച പ്രകടനമാണ് കെ. നാരായണന് നായർ കാഴ്ചവെച്ചത്.
ഇതിന് മുമ്പ് ഗോവയിലെ ഫെറ്റോര്ഡ സ്റ്റേഡിയത്തില് നടന്ന ആറാമത് മാസ്റ്റേഴ്സ് നീന്തല് മത്സരത്തില് സ്വര്ണ്ണ, വെളളി മെഡലും നാരായണന് നായര് കരസ്ഥമാക്കിയിരുന്നു. 100 മീറ്റര് ബാക്ക് സ്ട്രോക്കിലാണ് സ്വര്ണ നേടിയത്. 50 മീറ്റര്ബാക്ക് സ്ട്രോക്കിലും 50 മീറ്റര് ഫ്രീസ്റ്റൈലിലുമായി രണ്ടുവെള്ളി മെഡലുകളും ഇദ്ദേഹം കരസ്ഥമാക്കിയിരുന്നു. എഴുപത് വയസ് കഴിഞ്ഞവരുടെ വിഭാഗത്തില് മത്സരിച്ചാണ് ഈ നേട്ടം കൈവരിച്ചത്. എറണാകുളത്ത് നടന്ന സംസ്ഥാന മത്സരത്തില് മൂന്ന് ഇനത്തിലും വെള്ളിമെഡലായിരുന്നു ലഭിച്ചത്. ദേശീയ തലത്തില് പ്രകടനം മെച്ചപ്പെടുത്തിയതോടെ അന്താരാഷ്ട്ര മത്സരത്തിനൊരുങ്ങുകയാണ് നാരായണന് നായര്.
പന്തലായിനി അഘോര ശിവക്ഷേത്രത്തോടനുബന്ധിച്ചുള്ള ക്ഷേത്ര കുളത്തില് വളരെ ചെറുപ്പം മുതലെ നാരായണന് നീന്തല് പരിശീലിച്ചിരുന്നു. കൊയിലാണ്ടി പന്തലായനി മേഖലയിലെ ഒട്ടനവധി വിദ്യാര്ത്ഥികളുടെ നീന്തല് കോച്ചു കൂടിയാണ് ഇദ്ദേഹം കൊയിലാണ്ടി ബസ് സ്റ്റാന്റ് പരിസരത്ത് ബാഗ് ഹൗസ് എന്ന സ്ഥാപനം നടത്തുകയാണിപ്പോള്.
