കൊയിലാണ്ടി നഗരസഭ നാലാം വാർഡ് നെല്ല്യാടി പുഴയോരത്തു കൊന്നേങ്കണ്ടി താഴെ ചീർപ്പിനോടു ചേർന്ന് ബണ്ടിൽ പണി പുരോഗമിച്ചുകൊണ്ടിരിക്കുന്ന ജൈവവൈവിധ്യ പാർക്ക് നിരവധി വ്യത്യസ്തതകൾകൊണ്ട് ശ്രദ്ധേയമാവുകയാണ്. നെല്ല്യാടി ഒരു വനിതാസൗഹൃദ ഉത്തരവാദിത്തടൂറിസം കേന്ദ്രവും കൊടക്കാട്ടുമുറി കുടുംബശ്രീയുടെ ഭാഗമായി വനിതാസംരംഭകരുടെ ക്ലസ്റ്റർ പ്രവർത്തനം സജീവമായി നടക്കുന്ന വാർഡും കൂടിയാണ് .
ഉയർന്ന സ്ത്രീ സാക്ഷരതയും കൂട്ടായ പ്രവർത്തനവും സ്ത്രീ മുന്നേറ്റവും ഏറ്റവും കൂടുതൽ കണ്ടുവരുന്ന ഇടവും കൂടിയാണ്. താരതമ്യേന സ്ത്രീസൗഹൃദ സംസ്കാരവും സ്ത്രീകൾ പുരുഷന്മാരോടൊപ്പം തൊഴിൽ തുല്യതയിലും ഒപ്പമെത്തിനിൽക്കുന്ന ഒരു നാടുമാണ് എന്നതാണ് പ്രത്യേകത. സ്ത്രീകൾക്കെതിരെയുള്ള അതിക്രമങ്ങൾ ഒന്നുംതന്നെ റിപ്പോർട്ട് ചെയ്യപ്പെടാത്തതും ഇതോടൊപ്പം ചേർത്തു വായിക്കേണ്ടതാണ് . ഇവിടെ ഉയർന്നുവരുന്ന ജൈവവൈവിധ്യപാർക്കിൽ നമ്മുടെ ജൈവസമ്പത്തിനെക്കുറിച്ചു അറിയാനും പഠിക്കാനും പൊതുജനങ്ങളിൽ അത്തരം ഒരു അവബോധം ജനിപ്പിക്കാനും കഴിയുന്നതാണ് . എല്ലാപ്രായക്കാർക്കും സായാഹ്നങ്ങൾ ആനന്ദകരമാക്കാൻ ഇവിടെ സന്ദർശിക്കുന്നതിലൂടെ കഴിയും.
