നവകേരള സൃഷ്ടിക്കുവേണ്ടി സംസ്ഥാന സർക്കാരിനൊപ്പം മൂടാടി ഗ്രാമപഞ്ചായത്തിൽ നടപ്പിലാക്കിയ വികസന പ്രവർത്തനങ്ങൾ വിലയിരുത്തുവാനും ഭാവിയിൽ ചെയ്യേണ്ട കാര്യങ്ങളെ സംബന്ധിച്ച് സംവദിക്കാനുമായി വികസന സദസ്സ് സംഘടിപ്പിച്ചു. പഞ്ചായത്ത് ഓഡിറ്റോറിയത്തിൽ നടന്ന സദസ്സ് കെ. പി.കുഞ്ഞമ്മദ്കുട്ടി എം.എൽ.എ ഉദ്ഘാടനം ചെയ്തു. മൂടാടി ഗ്രാമപഞ്ചായത്ത് പ്രസിഡണ്ട് സി.കെ. ശ്രീകുമാർ അധ്യക്ഷത വഹിച്ചു. സംസ്ഥാന സർക്കാറിന്റെ വികസന പ്രവർത്തനങ്ങളുടെ അവതരണം റിസോഴ്സ് പേഴ്സൺ ഗിരീഷ് കുമാറും ഗ്രാമപഞ്ചായത്ത് വികസന നേട്ടങ്ങളുടെ അവതരണം പഞ്ചായത്ത് സെക്രട്ടറി ജിജിയും അവതരിപ്പിച്ചു.
പരിപാടിയിൽ ഹരിത കർമ്മസേന അംഗങ്ങൾക്കുള്ള സുരക്ഷാ ഉപകരണ വിതരണവും ഡയാലിസിസ് രോഗികൾക്ക് പ്രസിഡണ്ടിന്റെ ദുരിതാശ്വാസ നിധിയിൽ നിന്നുള്ള ധനസഹായ വിതരണവും നടന്നു. ജില്ലാ പഞ്ചായത്തംഗം എം.പി. ശിവാനന്ദൻ, പന്തലായനി ബ്ലോക്ക് പഞ്ചായത്ത് ഉപാധ്യക്ഷ ചൈത്ര വിജയൻ, ഗ്രാമപഞ്ചായത്ത് ഉപാധ്യക്ഷ ഷീജ പട്ടേരി, സ്ഥിരംസമിതി അധ്യക്ഷരായ എം.കെ.മോഹനൻ, എം.പി.അഖില, ടി.കെ.ഭാസ്കരൻ, കെ.ജീവാനന്ദൻ, ആസൂത്രണ സമിതി ഉപാധ്യക്ഷൻ കെ.കെ.രഘുനാഥ്, പഞ്ചായത്ത് അസി. സെക്രട്ടറി എൻ.കെ.സുധീഷ് എന്നിവർ സംസാരിച്ചു.
