ഉള്ളിയേരി: ഒള്ളൂർ ഗവ യു പി സ്കൂളിൽ വായന മാസാചരണത്തിന്റെ ഭാഗമായി വിദ്യാരംഗം കലാസാഹിത്യ വേദിയുടെ ആഭിമുഖ്യത്തിൽ മുത്തശ്ശിക്കഥകളുടെ മായാ ലോകം കുഞ്ഞു മനസ്സുകൾക്ക് തുറന്നു കൊടുക്കാൻ ഒരു മുത്തശ്ശിക്കഥ എന്ന പേരിൽ നടന്ന പരിപാടി ഏറെ ശ്രദ്ധേയമായി മാറി. ഒള്ളൂർ തുരുത്തിയിൽ മാധവി അമ്മയാണ് കുട്ടികൾക്ക് വിവിധ കുട്ടിക്കഥകൾ പറഞ്ഞു നൽകിയത്.
റീലുകളുടെയും ഡിജിറ്റൽ സാങ്കേതിക വിദ്യയുടെയും ഈ കാലഘട്ടത്തിൽ ഇങ്ങനെയൊരു പരിപാടി കുട്ടികളിൽ നവ്യാനുഭവമായിരുന്നു. പുതു തലമുറയ്ക്ക് അന്യമായിക്കൊണ്ടിരിക്കുന്ന മുത്തശ്ശിക്കഥകളുടെ മാധുര്യം കുട്ടികൾക്ക് പകർന്നു നൽകാൻ ഈ പരിപാടിയിലൂടെ കഴിഞ്ഞുവെന്ന് ഹെഡ്മാസ്റ്റർ ഇ. പ്രകാശൻ പറഞ്ഞു. കുഞ്ഞു കഥകളും പാട്ടുകളുമായി കുട്ടികളും പരിപാടിയെ കൂടുതൽ മികവുറ്റതാക്കി. ശ്രീകാന്ത്. എം സ്വാഗതം പറഞ്ഞ ചടങ്ങിൽ അഖിൽ. കെ എസ്, നിസ്വ തസ്ലിം എന്നിവർ ആശംസയും അശ്വതി അജിത്ത് നന്ദിയും പറഞ്ഞു.
