കൊയിലാണ്ടി: മുത്താമ്പി-ആഴാവില്ത്താഴ നടപ്പാത ഗതാഗത യോഗ്യമാക്കണമെന്നാവശ്യപ്പെട്ട് കോണ്ഗ്രസ് പ്രവര്ത്തകര് സായാഹ്ന ധര്ണ്ണ നടത്തി. തകര്ന്ന് ചെളിക്കളമായി മാറിയ നടപ്പാതയില് വാഴ നട്ടാണ് പ്രവര്ത്തകര് പ്രതിഷേധിച്ചത്. ഫുട്ട് പാത്ത് തകര്ന്ന് നാളുകള് പിന്നിട്ടിട്ടും സഞ്ചാര യോഗ്യമാക്കാന് നടപടി സ്വീകരിക്കാത്തതില് പ്രതിഷേധിച്ചാണ് കോണ്ഗ്രസ് 117, 118 ബൂത്ത് കമ്മിറ്റികളുടെ നേതൃത്വത്തില് സായാഹ്ന ധര്ണ്ണ നടത്തിയത്.
കൊയിലാണ്ടി സൗത്ത് മണ്ഡലം കോണ്ഗ്രസ് പ്രസിഡന്റ് അരുണ് മണമല് ധര്ണ്ണ ഉദ്ഘാടനം ചെയ്തു. റാഷിദ് മുത്താമ്പി അധ്യക്ഷനായി. എന്.ബാലകൃഷ്ണന്, ശ്രീധരന് നായര് പുഷ്പശ്രീ, ബാലന് കിടാവ്, പുതുക്കുടി നാരായണന്, രവി കൊല്ലറക്കല്, റഹീസ് കുന്നാനാരി, ബാബു പുതിയോട്ടില്, പിലാക്കാട്ട് ശ്രീധരന്, രാജന് പൊന്നിയത്ത് എന്നിവര് സംസാരിച്ചു.
