മഞ്ഞപ്പിത്തം പടരുന്നു പ്രതിരോധ പ്രവർത്തനം തുടങ്ങി

കിഴക്കോത്ത്: മഞ്ഞപ്പിത്തവും മറ്റ് പകർച്ചവ്യാധികളും പടരുന്ന സാഹചര്യത്തിൽ കിഴക്കോത്ത് ഗ്രാമപഞ്ചായത്ത് തല വിജിലൻസ് സ്ക്വാഡിൻ്റെ നേതൃത്വത്തിൽ വ്യാപക പരിശോധന നടത്തി ഉപ്പിലിട്ട പഴവർഗ്ഗങ്ങൾ, കുലുക്കി സർബത്ത്, ദം സോഡാ , മസാല സോഡ’ എന്നിവ വിൽക്കുന്നത് തടഞ്ഞു.
എരിവും പുളിയും, മറ്റ് മസാല കൂട്ടുകളും ചേർത്തുള്ള പാനീയങ്ങൾ കിഡ്നി, കരൾ എന്നിവയെ ദോഷകരമായി ബാധിക്കുമെന്ന് ആരോഗ്യ വകുപ്പ് മുന്നറിപ്പ് നൽകുന്നു. ആരോഗ്യ വകുപ്പിൻ്റെ നിർദ്ദേശങ്ങൾ പാലിക്കാത്തവർക്കെതിരെ പഞ്ചായത്ത് രാജ് ആക്ട്, കേരള പബ്ലിക് ഹെൽത്ത് ആക്ട് എന്നിവ പ്രകാരം നടപടികൾ സ്വീകരിക്കും. ആരോഗ്യ വകുപ്പ് ഹെൽത്ത് ഇൻസ്പെക്ടർ ബിജു ബാലുശ്ശേരി , ഗ്രാമ പഞ്ചായത്ത് ഹെൽത്ത് ഇൻസ്പെക്ടർ അശ്വതി , ജൂനിയർ ഹെൽത്ത് ഇൻസ്പെക്ടർ വിനോദ്, വില്ലേജ് എക്സ്റ്റൻഷൻ ഓഫിസർ സനൂപ്, കൊടുവള്ളി പോലീസ് ഓഫീസർമാർ എന്നിവർ പരിശോധനയിൽ പങ്കെടുത്തു. തുടർന്നുള്ള ദിവസങ്ങളിൽ കർശന പരിശോധനകൾ തുടരുമെന്നും നിർദ്ദേശങ്ങൾ പാലിക്കാത്തവർക്കെതിരെ നിയമാനുസൃത നടപടികൾ സ്വീകരിക്കുന്നതാണെന്നും പഞ്ചായത്ത് പ്രസിഡൻ്റ് ശ്രീമതി സാജിദത്തും പഞ്ചായത്ത് സെക്രട്ടറി അൻസു . ഒ എ യും അറിയിച്ചു