യു.ജി.സി രാജ്യത്തെ വ്യാജ സര്‍വകലാശാലകളുടെ വിവരങ്ങള്‍ പുറത്തുവിട്ടു. 21 വ്യാജ സര്‍വകലാശാലകള്‍ രാജ്യത്ത് പ്രവര്‍ത്തിക്കുന്നുവെന്ന് യു.ജി.സി വ്യക്തമാക്കി. മഹാരാഷ്ട്ര, ഉത്തർപ്രദേശ്, ആന്ധ്രാപ്രദേശ്, കർണാടക, പശ്ചിമ ബംഗാൾ, കേരളം, കേന്ദ്രഭരണ പ്രദേശമായ ഡൽഹി എന്നിവയുൾപ്പെടെ ഏഴ് സംസ്ഥാനങ്ങളിൽ പ്രവര്‍ത്തിക്കുന്ന 21 സര്‍വകലാശാലകള്‍ വ്യാജമാണെന്ന് യു.ജി.സി കണ്ടെത്തിയിട്ടുണ്ട്.
ഈ സർവകലാശാലകൾ നൽകുന്ന ബിരുദങ്ങൾ ഉന്നത വിദ്യാഭ്യാസത്തിനോ തൊഴിൽ ആവശ്യങ്ങൾക്കോ വേണ്ടി അംഗീകരിക്കില്ലെന്നും ഇത്തരം സര്‍വകലാശാലകള്‍ക്ക് ബിരുദങ്ങൾ നൽകാനുള്ള നിയമസാധുത ഇല്ലെന്നും യു.ജി.സി സെക്രട്ടറി മനീഷ് ജോഷി വ്യക്തമാക്കി.
വ്യാജ സർവകലാശാലയിൽ ചേരുന്നത് ഗുരുതരമായ പ്രത്യാഘാതങ്ങൾക്ക് ഇടയാക്കുമെന്ന് അധികൃതര്‍ മുന്നറിയിപ്പ് നല്‍കുന്നു. ഈ സ്ഥാപനങ്ങളിലെ ബിരുദധാരികൾക്ക് സാധുവായ ബിരുദങ്ങൾ ലഭിക്കില്ല, ബിരുദം ആവശ്യമുള്ള ജോലികൾക്ക് അവരെ അയോഗ്യരാക്കുന്നു, വിദ്യാര്‍ഥികള്‍ക്ക് തുടർവിദ്യാഭ്യാസത്തിനും സാധിക്കില്ല. വ്യാജ സർവകലാശാലകള്‍ ഉയര്‍ന്ന ഫീസ് ഈടാക്കിയാണ് വിദ്യാര്‍ഥികള്‍ക്ക് പ്രവേശനം നല്‍കുന്നതെന്നും അധികൃതര്‍ വ്യക്തമാക്കി.
ഏറ്റവുമധികം വ്യാജ സർവകലാശാലകൾ കണ്ടെത്തിയ ഡൽഹിയാണ് എട്ട് സ്ഥാപനങ്ങളുമായി പട്ടികയിൽ ഒന്നാമത്. നാലെണ്ണവുമായി ഉത്തർപ്രദേശാണ് തൊട്ടുപിന്നിൽ. മറ്റ് സംസ്ഥാനങ്ങളായ ആന്ധ്രാപ്രദേശ്, പശ്ചിമ ബംഗാൾ, കേരളം എന്നിവിടങ്ങളിൽ രണ്ടെണ്ണം വീതവും മഹാരാഷ്ട്ര, കർണാടക, പുതുച്ചേരി എന്നിവിടങ്ങളില്‍ ഓരോ വ്യാജ സർവകലാശാലയും കണ്ടെത്തിയിട്ടുണ്ട്.
യുജിസി കണ്ടെത്തിയ വ്യാജ സർവകലാശാലകളുടെ പട്ടിക
ഡൽഹി:
1. ഓൾ ഇന്ത്യ ഇൻസ്റ്റിറ്റ്യൂട്ട് ഓഫ് പബ്ലിക് ആൻഡ് ഫിസിക്കൽ ഹെൽത്ത് സയൻസസ്
2. വാണിജ്യ സർവകലാശാല, ദര്യഗഞ്ച്
3. യുണൈറ്റഡ് നേഷൻസ് യൂണിവേഴ്‌സിറ്റി
4. വൊക്കേഷണൽ യൂണിവേഴ്‌സിറ്റി
5. ADR-കേന്ദ്രീകൃത ജൂറിഡിക്കൽ യൂണിവേഴ്‌സിറ്റി
6. ഇന്ത്യൻ ഇൻസ്റ്റിറ്റ്യൂഷൻ ഓഫ് സയൻസ് ആൻഡ് എഞ്ചിനീയറിങ്
7. സ്വയം തൊഴിലിനായി വിശ്വകർമ ഓപ്പൺ യൂണിവേഴ്‌സിറ്റി
8. ആധ്യാത്മിക് വിശ്വവിദ്യാലയം (ആത്മീയ സർവകലാശാല)
ഉത്തർപ്രദേശ്:
1. ഗാന്ധി ഹിന്ദി വിദ്യാപീഠം
2. മഹാമായ സാങ്കേതിക സർവകലാശാല
4. ഭാരതീയ ശിക്ഷാ പരിഷത്ത്
ആന്ധ്രപ്രദേശ്:
1. ക്രൈസ്റ്റ് ന്യൂ ടെസ്റ്റ്മെന്‍റ് ഡീംഡ് യൂണിവേഴ്‌സിറ്റി
2. ബൈബിൾ ഓപ്പൺ യൂണിവേഴ്‌സിറ്റി ഓഫ് ഇന്ത്യ
പശ്ചിമ ബംഗാൾ:
1. ഇന്ത്യൻ ഇൻസ്റ്റിറ്റ്യൂട്ട് ഓഫ് ആൾട്ടർനേറ്റീവ് മെഡിസിൻ
2. ഇൻസ്റ്റിറ്റ്യൂട്ട് ഓഫ് ആൾട്ടർനേറ്റീവ് മെഡിസിൻ ആൻഡ് റിസർച്ച്
കേരളം
1. ഇന്‍റര്‍നാഷണൽ ഇസ്‌ലാമിക് യൂണിവേഴ്‌സിറ്റി ഓഫ് പ്രൊഫെറ്റിക് മെഡിസിൻ (IIUPM)
2. സെന്‍റ് ജോൺസ് യൂണിവേഴ്‌സിറ്റി
കർണാടക:
1. ബദഗൻവി സർക്കാർ വേൾഡ് ഓപ്പൺ യൂണിവേഴ്‌സിറ്റി എഡ്യൂക്കേഷൻ സൊസൈറ്റി
മഹാരാഷ്ട്ര:
1. രാജ അറബിക് യൂണിവേഴ്‌സിറ്റി
പുതുച്ചേരി :
1. ശ്രീ ബോധി അക്കാദമി ഓഫ് ഹയർ എജ്യുക്കേഷൻ
