കേരളത്തിലേക്ക് പത്ത് പുതിയ വന്ദേ മെട്രോ ട്രെയിനുകൾ (നമോ ഭാരത് റാപ്പി‍ഡ് റെയിൽ) കൂടി എത്തുന്നു. ഇന്റർസിറ്റി യാത്രകൾക്കായുള്ള ആധുനിക എസി ട്രെയിനുകളായ വന്ദേ മെട്രോവിൻ്റെ പരമാവധി വേഗം 130 കിലോമീറ്ററാണ്. ഓട്ടമാറ്റിക് സ്ലൈഡിങ് ഡോറുകളും സിസിടിവി ക്യാമറകളും ട്രെയിനിലുണ്ട്.
കേരളത്തിൽ വന്ദേ മെട്രോയുടെ റൂട്ടുകൾ സംബന്ധിച്ച ഏകദേശ ചിത്രവും തെളിഞ്ഞിട്ടുണ്ട്. തിരുവനന്തപുരം, പാലക്കാട് ഡിവിഷനുകളിൽ വന്ദേ മെട്രോയ്ക്കായി നേരത്തെ 10 റൂട്ടുകൾ ശുപാർശ ചെയ്തിരുന്നു. ഇവയിൽ തന്നെയാകും പുതിയ ട്രെയിനുകൾ ഓടിത്തുടങ്ങുക. പാസഞ്ചർ / മെമു ട്രെയിനുകൾക്ക് പകരമായാണ് ട്രെയിനുകൾ ഓടിത്തുടങ്ങുക.
വന്ദേ മെട്രോ ട്രെയിനുകൾക്ക് എക്‌സ്പ്രസ് ട്രെയിനുകളിലെ സൗകര്യങ്ങളുണ്ടെങ്കിലും നിരക്ക് താരതമ്യേന കുറവാണ്. എട്ട് മുതൽ 16 കോച്ചുകൾ വരെയാണ് നമോ ഭാരത് ട്രെയിനുകൾക്ക് നിർമിക്കുന്നത്. സാധാരണ കോച്ചുകളിൽ 104 പേർക്ക് ഇരിക്കാനും 185 പേർക്ക് നിൽക്കാനും കഴിയും.
