കൊയിലാണ്ടിയിൽ നിന്നും നിരോധിത പുകയില ഉൽപ്പന്നങ്ങൾ പിടികൂടി. മംഗലാപുരത്തു നിന്നും എറണാകുളത്തേക്ക് കൊണ്ടുപോവുകയായിരുന്ന 29 ചാക്ക് നിരോധിത പുകയില ഉൽപ്പന്നങ്ങൾ ആണ് ജി. എസ്. ടി എൻഫോഴ്സ്മെൻ്റ് കൊയിലാണ്ടി സ്ക്വാഡ് ഇന്ന് പുലർച്ചെ 4 മണിക്ക് കൊയിലാണ്ടിയിൽ നിന്ന് പിടികൂടിയത്.
ജോ.കമ്മീഷണർ അശോകൻ, ഡെപ്യൂട്ടി കമ്മീഷണർ, ഇൻ ചാർജ് കൃഷ്ണകുമാർ എന്നിവരുടെ നിർദ്ദേശപ്രകാരം എൻഫോഴ്സ്മെൻ്റ് ഓഫീസർ പ്രമോദ് ജി വി, ഡെപ്യൂട്ടി എൻഫോഴ്സ്മെൻ്റ് ഓഫീസർ ശിവദാസൻ ഇ കെ ,ബിനു സി എന്നിവർ ഉൾപ്പെട്ട സ്പെഷൽ ഇലക്ഷൻ എൻഫോഴ്സ്മെൻ്റ് സ്ക്വാഡ് നടത്തിയ വാഹന പരിശോധനക്കിടയിലാണ് 10 ലക്ഷം രൂപ വിലവരുന്ന നിരോധിത പുകയില ഉൽപ്പന്നങ്ങൾ പിടിച്ചെടുത്തത് . തുടർനടപടികൾക്കായി ഇലക്ഷൻ ഫ്ലൈയിംഗ് സ്ക്വാഡിനും പിന്നീട് എക്സൈസ് വകുപ്പിനും കൈമാറി.
