ഡോ. വന്ദന ദാസിന്റെ ഓർമയ്ക്കായി മാതാപിതാക്കൾ ക്ലിനിക് നിർമിക്കുന്നു. വന്ദനയുടെ വിവാഹത്തിനായി നീക്കിവച്ച പണമുപയോഗിച്ചാണ് മാതാപിതാക്കളായ കെജി മോഹൻദാസും ടി വസന്തകുമാരിയും ചേർന്ന് ക്ലിനിക് പണിയുന്നത്. തൃക്കുന്നപ്പുഴയിൽ സാധാരണക്കാർക്കായി ക്ലിനിക് പണിയണമെന്ന വന്ദനയുടെ ആഗ്രഹമാണ് ഇതിനു പിന്നിൽ.
തൃക്കുന്നപ്പുഴയിൽ വന്ദനയുടെ അമ്മയ്ക്ക് കുടുംബ ഓഹരി കിട്ടിയ സ്ഥലത്ത് ഡോ വന്ദന ദാസ് മെമ്മോറിയൽ ക്ലിനിക് എന്ന പേരിലാകും ക്ലിനിക് പ്രവർത്തിക്കുക. ചെറുപ്പം മുതലേ ഇവിടേയ്ക്ക് വരാൻ വന്ദനയ്ക്ക് താൽപ്പര്യമുണ്ടായിരുന്നതായി വന്ദനയുടെ അമ്മ പറയുന്നു. ഇവിടെ സാധാരണക്കാർക്കായി ഒരു ക്ലിനിക് നിർമിക്കണമെന്ന് വന്ദന എപ്പോഴും പറയുമായിരുന്നെന്ന് അമ്മ പറഞ്ഞു.
