മയക്കുമരുന്ന് കേസുകൾ ഉൾപ്പെടെ അഞ്ചോളം കേസുകളിൽ പ്രതിയായി ജയിലിൽ കഴിഞ്ഞിട്ടുള്ള കോഴിക്കോട് ഭട്ട്റോഡ് സ്വദേശി റോബർട്ട് ജെയിംസ്, പയ്യാനക്കൽ സ്വദേശി ഫിനാൻ നാസിം, നടുവണ്ണൂർ സ്വദേശി മുഹമ്മദ് റിസ്വാൻ, കല്ലായി സ്വദേശി ശഹറീസ് എന്നിവരാണ് അറസ്റ്റിലായത്.
ഡാൻസാഫ് സംഘവും നടക്കാവ് പോലീസും ചേർന്ന് നടക്കാവിലെ സ്വകാര്യ ലോഡ്ജിൽ നിന്നാണ് ഇവരെ പിടികൂടിയത്. പോലീസ് സ്ഥലത്തെത്തുമ്പോൾ ലഹരി വസ്തുക്കൾ പായ്ക്കറ്റുകളിലാക്കി വിതരണം ചെയ്യുന്നതിനുള്ള ഒരുക്കത്തിലായിരുന്നു സംഘം. സ്കൂൾ വിദ്യാർത്ഥികളെ ലക്ഷ്യമിട്ടാണ് ലഹരി വിൽപ്പന നടത്തിയതെന്ന് പോലീസ് വ്യക്തമാക്കി.
ഇതിനിടെ, നഗരത്തിൽ വിതരണത്തിനായി എത്തിച്ച 42 കിലോ കഞ്ചാവുമായി മറ്റൊരു യുവാവിനെയും പോലീസ് അറസ്റ്റ് ചെയ്തു. ഓമശ്ശേരി സ്വദേശി പുറയിൽ ജംഷീർ (33) ആണ് ഡാൻസാഫ് സംഘത്തിന്റെ പിടിയിലായത്. മുണ്ടിക്കൽതാഴം പട്ടാളമുക്ക് പരിസരത്ത് ഇന്നലെ രാത്രി നടത്തിയ പരിശോധനയിലാണ് അറസ്റ്റ്. നേരത്തെ നാല് കിലോ കഞ്ചാവ് പിടികൂടിയ കേസിൽ അറസ്റ്റിലായി ജാമ്യത്തിലിറങ്ങിയതിന് പിന്നാലെയാണ് ഇയാൾ വീണ്ടും കഞ്ചാവുമായി പിടിയിലായത്.
