വിവിധ ആവശ്യങ്ങള് ഉന്നയിച്ച് പ്രതിഷേധരംഗത്തുള്ള മെഡിക്കല് കോളജ് ഡോക്ടര്മാര് നാളെ മുതല് അനിശ്ചിതകാല സമരം ആരംഭിക്കും. 13 മുതല് അധ്യാപന പ്രവര്ത്തനങ്ങള് പൂര്ണമായി നിര്ത്തിവെക്കാനും തീരുമാനിച്ചിട്ടുണ്ട്. തുടര്ന്നുള്ള ആഴ്ച മുതല് അടിയന്തരമല്ലാത്ത ചികിത്സകളും നിര്ത്തിവെക്കും. നിസ്സഹകരണ സമരവും ശക്തമാക്കുമെന്ന് സംഘടനാ നേതാക്കള് അറിയിച്ചു.
അതേസമയം, അത്യാഹിത വിഭാഗം, ലേബര് റൂം, ഐസിയു, കിടത്തിച്ചികിത്സ, മറ്റ് അടിയന്തര ചികിത്സകള്, അടിയന്തര ശസ്ത്രക്രിയകള്, പോസ്റ്റ്മോര്ട്ടം എന്നിവയെ പ്രതിഷേധ പരിപാടികളില്നിന്ന് ഒഴിവാക്കിയിട്ടുണ്ട്.
ശമ്പളപരിഷ്കരണ ഉത്തരവിലെ അപാകതകള് പരിഹരിക്കുക, ശമ്പളവും ഡി.എ കുടിശ്ശികയും നല്കുക, താല്ക്കാലികവും കൂട്ടസ്ഥലംമാറ്റങ്ങളും ഒഴിവാക്കുക, പുതിയ തസ്തികകള് സൃഷ്ടിക്കുക തുടങ്ങിയ ആവശ്യങ്ങളുന്നയിച്ചാണ് ജൂലൈ മുതല് സംഘടന പ്രതിഷേധം തുടരുന്നത്.
