കൊയിലാണ്ടി: ഭിന്നശേഷിക്കാരായ കുട്ടികളുടെ രക്ഷിതാക്കൾക്ക് സാമ്പത്തിക സ്വയംപര്യാപ്തത ഉറപ്പാക്കുന്നതിനായി നെസ്റ്റ് ഇന്റർനാഷണൽ അക്കാദമി ആൻഡ് റിസർച്ച് സെന്റർ (NIARC) നടപ്പിലാക്കുന്ന ‘പാരന്റ് എംപവർമെന്റ്’ പദ്ധതിയുടെ ഭാഗമായി ഇലക്ട്രിക് ഓട്ടോ ഫ്ലാഗ് ഓഫ് ചടങ്ങ് സംഘടിപ്പിച്ചു. രക്ഷിതാക്കൾക്ക് മാന്യമായ ഉപജീവനമാർഗം ഒരുക്കുക എന്ന ലക്ഷ്യത്തോടെയാണ് ഈ പദ്ധതി നടപ്പിലാക്കുന്നത്
കട്ട് ഫ്രൂട്ട് ബോക്സ് നർമ്മാണം, അച്ചാർ നിർമ്മാണം, തയ്യിൽ പരിശീലനം, തുടങ്ങിയ സ്വയംതൊഴിൽ പദ്ധതികൾക്ക് തുടർച്ചയായാണ് രക്ഷിതാക്കൾക്ക് ഡ്രൈവിംഗ് പരിശീലനം നൽകുന്ന പദ്ധതി ആരംഭിച്ചത്. പദ്ധതിയുടെ ഭാഗമായി ഏകദേശം 40 ഓളം രക്ഷിതാക്കൾ ഇതിനോടകം ഡ്രൈവിംഗ് പരിശീലനം വിജയകരമായി പൂർത്തിയാക്കിയിട്ടുണ്ട്. കുട്ടികളുടെ ചികിത്സയ്ക്കും പരിചരണത്തിനുമായി കൂടുതൽ സമയം മാറ്റിവെക്കേണ്ടി വരുന്ന രക്ഷിതാക്കൾക്ക്, സ്വന്തം നാട്ടിൽ തന്നെ സ്ഥിരവരുമാനം കണ്ടെത്താൻ കഴിയുന്ന തൊഴിൽ അവസരം ഒരുക്കുക എന്നതാണ് പദ്ധതിയുടെ മുഖ്യലക്ഷ്യം.
ഇലക്ട്രിക് ഓട്ടോ പദ്ധതിയിലൂടെ പരിശീലനം നേടിയ രക്ഷിതാക്കൾക്ക് സ്വയം വരുമാനം കണ്ടെത്താനും കുടുംബത്തിന്റെ സാമ്പത്തിക സുരക്ഷ ഉറപ്പാക്കാനും സാധിക്കുമെന്ന് പ്രത്യാശിക്കുന്നതായി സംഘാടകർ അറിയിച്ചു. ഒരു തൊഴിൽ പഠിപ്പിക്കുന്നതിലുപരി, ഭിന്നശേഷിക്കാരായ കുട്ടികളുടെ കുടുംബങ്ങൾക്ക് ആത്മവിശ്വാസത്തോടെയും അഭിമാനത്തോടെയും ജീവിതത്തെ നേരിടാനുള്ള കരുത്ത് പകരുകയാണ് ഈ പദ്ധതി.
നിയാർക്കിൽ വെച്ചുനടന്ന ചടങ്ങിൽ ബഹുമാനപ്പെട്ട മുനിസിപ്പൽ കൗൺസിലർ ശ്രീ. യു.കെ. ചന്ദ്രൻ ഓട്ടോറിക്ഷയുടെ താക്കോൽ കൈമാറി. ശ്രീ. കെ.കെ. രമേശൻ വൊക്കേഷണൽ ട്രെയിനിങ് അവാർഡുകൾ വിതരണം ചെയ്തു. കൊയിലാണ്ടി എസ്.ഐ. ശ്രീ. അവനീഷ് കുമാർ ഇലക്ട്രിക് ഓട്ടോ ഫ്ലാഗ് ഓഫ് ചെയ്തു.
നെസ്റ്റ് ജനറൽ സെക്രട്ടറി ടി.കെ. മുഹമ്മദ് യൂനുസ് സ്വാഗതം പറഞ്ഞ ചടങ്ങിൽ ചെയർമാൻ അബ്ദുള്ള കരുവഞ്ചേരി അധ്യക്ഷത വഹിച്ചു. ടി.പി. ബഷീർ, സാലിഹ് ബാത്ത, ടി.വി. കൃഷ്ണൻ എന്നിവർ ചടങ്ങിൽ സന്നിഹിതരായിരുന്നു. ഇതോടനുബന്ധിച്ച് നിയാർക്കിൽ ക്രിസ്മസ്–പുതുവത്സരാഘോഷങ്ങളും സംഘടിപ്പിച്ചു. കുട്ടികളുടെയും രക്ഷിതാക്കളുടെയും സ്റ്റാഫിന്റെയും പങ്കാളിത്തത്തോടെ മനോഹരമായ കലാപരിപാടികളും അരങ്ങേറി.a
