പണികൾ പൂർത്തിയാക്കാതെ നഗരസഭ ഷോപ്പിംഗ് കോംപ്ലക്സ് ഉദ്ഘാടനം ചെയ്യാനുള്ള നഗരസഭ നീക്കം അപഹാസ്യം: കൊയിലാണ്ടി മുനിസിപ്പൽ യു.ഡി.എഫ് കമ്മിറ്റി

കൊയിലാണ്ടി: നഗരമധ്യത്തിൽ പഴയ ബസ് സ്റ്റാൻഡ് നിലനിന്നിരുന്ന സ്ഥലത്ത് കൊയിലാണ്ടി നഗരസഭ നിർമ്മിക്കുന്ന ഷോപ്പിംഗ് കോംപ്ലക്സ് പണി പൂർത്തിയാക്കാതെ തിടുക്കപ്പെട്ട് ഉൽഘാടനം ചെയ്യാനുള്ള നീക്കം ഉപേക്ഷിക്കണമെന്ന് കൊയിലാണ്ടി മുനിസിപ്പൽ UDF കമ്മിറ്റി അധികൃതരോട് ആവശ്യപ്പെട്ടു. തദ്ദേശ സ്വയംഭരണ സ്ഥാപന ഇലക്ഷൻ വിജ്ഞാപനം ദിവസങ്ങൾക്കകം വരുമെന്നിരിക്കെ പണി പൂർത്തിയാകാത്ത നഗരമധ്യത്തിലെ ഷോപ്പിംഗ് കോംപ്ലക്സ് തുറന്നു കൊടുക്കാൻ നഗരസഭ ഏകപക്ഷീയമായി തീരുമാനിക്കുകയായിരുന്നു. സ്ഥലം എം.പി ഷാഫി പറമ്പിലിനെ പങ്കെടുപ്പിക്കാതെയാണ് ഉദ്ഘാടനം നിശ്ചയിച്ചിട്ടുള്ളത്. കെട്ടിടത്തിൽ അടിസ്ഥാന സൗകര്യങ്ങൾ പോലും ഒരുങ്ങിയിട്ടില്ല. അടിസ്ഥാന സുസ്ഥിര വികസന രംഗത്ത് യാതൊരു നേട്ടങ്ങളും പറയാനില്ലാത്ത ഭരണ സമിതി ഭരണപരാജയം മറച്ചു പിടിക്കുന്നതിനാണ് പണിതീരാത്ത കെട്ടിടം ഉൽഘാടനം ചെയ്യുന്നത്. നിലവിലുള്ള ഭരണ സമിതിയുടെ കാലാവധി തീരാൻ ദിവസങ്ങൾ മാത്രം അവശേഷിക്കേ പണിതീരാതെ ഉൽഘാടനം ചെയ്യാൻ തീരുമാനിച്ചത് തെരഞ്ഞെടുപ്പിലെ LDF പരാജയം മുന്നിൽ കണ്ടു കൊണ്ടാണെന്ന് UDF മുനിസിപ്പൽ കമ്മിറ്റി ചെയർമാൻ അൻവർ ഇയ്യഞ്ചേരിയും കൺവീനർ കെ.പി. വിനോദ് കുമാറും ആരോപിച്ചു.