കുറ്റ്യാടി നിയോജകമണ്ഡലത്തിലെ മണിയൂര്‍, വില്യാപ്പള്ളി ഐടിഐകള്‍ക്കായുള്ള കെട്ടിട നിര്‍മാണം അന്തിമഘട്ടത്തിലേക്ക്. മണ്ഡലത്തിലെ വിവിധ പൊതുമരാമത്ത് പ്രവൃത്തികളുമായി ബന്ധപ്പെട്ട് വടകര റസ്റ്റ് ഹൗസില്‍ ചേര്‍ന്ന സിഎംടി യോഗത്തില്‍, മണിയൂര്‍ ഐടിഐയുടെ പുതിയ കെട്ടിടത്തിന്റെ കോണ്‍ക്രീറ്റിങ് പൂര്‍ത്തിയായതായും വില്യാപ്പള്ളി ഐടിഐയുടെ ഫ്‌ളോറിങ് 90 ശതമാനം പൂര്‍ത്തീകരിച്ചതായും ഉദ്യോഗസ്ഥര്‍ അറിയിച്ചു. വില്യാപ്പള്ളിയിലെ കെട്ടിടം പ്രവൃത്തി ജൂലൈയിലും മണിയൂരിലേത് ആഗസ്റ്റിലും പൂര്‍ത്തീകരിക്കാന്‍ കരാറുകാരന് യോഗം നിര്‍ദേശം നല്‍കി.
നൂതന രീതിയില്‍ ഡിസൈന്‍ ചെയ്ത രണ്ട് ഐടിഐ കെട്ടിടങ്ങളും വര്‍ക്‌ഷോപ്പ്, കമ്പ്യൂട്ടര്‍ ലാബ്, ടോയ്‌ലറ്റ് ബ്ലോക്ക്, സ്റ്റാഫ് റൂം, ക്ലാസ് റൂം, സ്റ്റോര്‍ റൂം തുടങ്ങിയ സൗകര്യങ്ങളോടെയാണ് സജ്ജമാക്കുക. ദീര്‍ഘകാലമായി സ്ഥലപരിമിതിയില്‍ പ്രയാസപ്പെട്ടിരുന്ന വില്യാപ്പള്ളി, മണിയൂര്‍ ഐടിഐ കെട്ടിടങ്ങള്‍ക്ക് സര്‍ക്കാരിന്റെ നൂറുദിന കര്‍മപരിപാടിയില്‍ ഉള്‍പ്പെടുത്തി 2023 ഏപ്രിലില്‍ പൊതുവിദ്യാഭ്യാസ, തൊഴില്‍ വകുപ്പ് മന്ത്രി വി ശിവന്‍കുട്ടിയാണ് ശിലയിട്ടത്.
യോഗത്തില്‍ കെ പി കുഞ്ഞമ്മദ് കുട്ടി മാസ്റ്റര്‍ എംഎല്‍എ അധ്യക്ഷത വഹിച്ചു. പെതുമരാമത്ത് വകുപ്പ് എക്‌സിക്യൂട്ടീവ് എഞ്ചിനീയര്‍ ശ്രീജയന്‍, അസിസ്റ്റന്റ് എക്‌സിക്യൂട്ടീവ് എഞ്ചിനീയര്‍ നിധിന്‍ ലക്ഷ്മണന്‍, എഞ്ചിനീയര്‍മാര്‍, ഓവര്‍സിയര്‍മാര്‍ എന്നിവര്‍ പങ്കെടുത്തു.
