കുറ്റ്യാടിയിൽ പ്രായപൂർത്തിയാകാത്ത വിദ്യാർത്ഥികൾക്ക് രാസലഹരി നൽകി പീഡിപ്പിച്ച സംഭവത്തിൽ സമഗ്രാന്വേഷണം ആവശ്യപ്പെട്ട് മുഖ്യമന്ത്രി പിണറായി വിജയന് കത്ത് അയച്ചതായി കോൺഗ്രസ് വർക്കിംഗ് കമ്മിറ്റി പ്രസിഡന്റ് ഷാഫി പറമ്പിൽ എംപി അറിയിച്ചു.
കേസുമായി ബന്ധപ്പെട്ട അന്വേഷണം കൂടുതൽ പേരിലേക്ക് വ്യാപിക്കുന്ന സാഹചര്യത്തിൽ, ലോക്കൽ പോലീസിൽ നിന്നും കേസ് നീക്കി, ജനങ്ങളുടെ വിശ്വാസം നേടിയെടുക്കുന്ന അന്വേഷണ ഏജൻസിക്ക് കൈമാറണമെന്ന് അദ്ദേഹം ആവശ്യപ്പെട്ടു. സംഭവവുമായി ബന്ധപ്പെട്ട കൂടുതൽ സത്യങ്ങൾ പുറത്തുകൊണ്ടുവരാൻ സർക്കാർ തയ്യാറാകണമെന്നും എംപി പറഞ്ഞു.
രാസലഹരി ശൃംഖലയിൽ കൂടുതൽ പേർ ഉൾപ്പെട്ടിട്ടുണ്ടാകാമെന്ന സംശയം അന്വേഷണ പരിധിയിൽ ഉൾപ്പെടുത്തേണ്ടതുണ്ട്. ഈ വിഷയത്തിൽ ഐ.ജി.യുമായി സംസാരിച്ചിട്ടുണ്ടെന്നും, അന്വേഷണം ശരിയായ വഴിയിലാണ് മുന്നേറുന്നതെന്നും ഓരോ സംഭവവും കൃത്യമായി നിരീക്ഷിച്ച് വരികയാണെന്നും ഷാഫി പറമ്പിൽ എംപി വ്യക്തമാക്കി.
“കേരളത്തിന്റെ മനസാക്ഷിയെ ഞെട്ടിച്ച സംഭവം” എന്നുപറഞ്ഞ അദ്ദേഹം, രാസലഹരി കൂട്ടുകെട്ടിനെതിരെ ജനങ്ങളെ ഉൾപ്പെടുത്തി ശക്തമായ സമരത്തിന് ജനങ്ങൾക്കൊപ്പം നിന്ന് നേതൃത്വം നൽകുമെന്നും എംപി പറഞ്ഞു
