കൊയിലാണ്ടി: ഹാർബർ എഞ്ചിനിയറിംഗ് വകുപ്പിൻ്റെ കൊയിലാണ്ടിയിലെ ഓഫീസ് നിർത്തലാക്കരുതെന്ന് കെ.ജി.ഒ.യു കൊയിലാണ്ടി താലൂക്ക് കമ്മിറ്റി ആവശ്യപ്പെട്ടു. നിരന്തരം കടലാക്രമണ ഭീഷണി നേരിടുന്ന കൊയിലാണ്ടി പ്രദേശത്ത് ഏക ആശ്രയമായ ഹാർബർ എഞ്ചിനീയറിംഗ് വകുപ്പ് കാര്യാലയം ഇല്ലാതാകുന്നത് തീരദേശ വാസികളെയും മത്സ്യത്തൊഴിലാളികളെയും പ്രതികൂലമായി ബാധിക്കും. ഹാർബർ എഞ്ചിനീയറിംഗ് വകുപ്പിന് കീഴിലെ ചേറ്റുവ, കൊയിലാണ്ടി, ചെറുവത്തൂർ സബ് ഡിവിഷനുകളിലെ 26 തസ്തികകൾ 2024- 2025 സാമ്പത്തിക വർഷം കഴിയുന്നതോട് കൂടി ഇല്ലാതാവുകയാണ്. ഇതു സംബന്ധിച്ച് തുറമുഖ വകുപ്പ് 2024 സെപ്തംബർ 9 ന് ഉത്തരവ് പുറപ്പെടുവിച്ചിട്ടുണ്ട്. തീരദേശ വാസികളുടെ ജീവിതം ദുരിതത്തിലാക്കുന്ന നടപടി പിൻവലിക്കണമെന്ന് കെ ജി ഒ യു കൊയിലാണ്ടി താലൂക്ക് സമ്മേളനം പ്രമേയത്തിലൂടെ ആവശ്യപ്പെട്ടു. കെ ജി ഒ യു സംസ്ഥാന വൈസ് പ്രസിഡൻ്റ് ബീന പൂവ്വത്തിൽ ഉദ്ഘാടനം ചെയ്തു. കെ ജി ഒ യു താലൂക്ക് പ്രസിഡൻ്റ് സാജിദ് അഹമ്മദ് അധ്യക്ഷത വഹിച്ചു. കെ ജി ഒ യു കൊല്ലം ജില്ലാ സെക്രട്ടറി എം എസ് രാകേഷ് മുഖ്യപ്രഭാഷണം നിർവഹിച്ചു. സംസ്ഥാന സെക്രട്ടേറിയേറ്റ് ക്ഷണിതാവ് വി സി സുബ്രഹ്മണ്യൻ, ജില്ലാ കമ്മിറ്റി ട്രഷറർ എം പി സബീർ സാലി, കെ ലത, ഡോ. ടി എം സാവിത്രി, പി കെ ബിജു, കെ ഹനീഫ്, കെ സിന്ധു എന്നിവർ സംസാരിച്ചു.
താലൂക്ക് കമ്മിറ്റി ഭാരവാഹികളായി സാജിദ് അഹമ്മദ് (പ്രസിഡൻ്റ്), ഡോ. ടി എം സാവിത്രി (സെക്രട്ടറി), പി കെ ബിജു (ട്രഷറർ) എന്നിവരെ തെരഞ്ഞെടുത്തു.
കൊയിലാണ്ടി ഹാർബർ എഞ്ചിനീയറിംഗ് വകുപ്പ് ഓഫീസ് നിർത്തലാക്കരുത്: കെ.ജി.ഒ യു
