ഒന്നര മാസത്തോളമായി ഉത്പാദനം നിർത്തിവച്ച പെരുവണ്ണാമൂഴി ചെറുകിട ജലവൈദ്യുത പദ്ധതിയുടെ നവീകരണവും അറ്റകുറ്റപ്പണിയും ഒരു മാസത്തിനകം പൂർത്തീകരിക്കും

മെഷീൻ തകരാർ നിമിത്തം കഴിഞ്ഞ ഒന്നര മാസത്തോളമായി ഉത്പാദനം നിർത്തിവച്ച 6 മെഗാവാട്ടിന്റെ പെരുവണ്ണാമൂഴി ചെറുകിട ജലവൈദ്യുത പദ്ധതി മെഷീൻ അറ്റകുറ്റപ്പണിയും നവീകരണ പ്രവർത്തിയും ഒരു മാസത്തിനകം പൂർത്തീകരിച്ച് ഉൽപാദനത്തിന് സജ്ജമാകുമെന്ന് അധികൃതർ അറിയിച്ചു. ജലവൈദ്യുതി പദ്ധതി പവർഹൗസിൽ പ്രവർത്തനം പുനരാരംഭിക്കാനായി ടെക്നിക്കൽ കമ്മിറ്റി രൂപീകരിച്ചു. കെഎസ്ഇബി ഉദ്യോഗസ്ഥ സംഘം പദ്ധതി മേഖല സന്ദർശിച്ച് മെഷീൻ തകരാർ കണ്ടെത്തി പരിഹരിക്കാനുള്ള നടപടികൾ ആരംഭിച്ചു. കോൺട്രാക്ടർമാരെ ഉൾപ്പെടുത്തി പ്രശ്നപരിഹാരത്തിന് ചർച്ച നടത്തി. മെഷീൻ തകരാർ ഉടൻ പരിഹരിക്കാൻ നിർദേശം നൽകി. പ്രോജക്ട് ചീഫ് എൻജിനീയർ വി.എൻ.പ്രസാദ് ചെയർമാനും എക്സിക്യൂട്ടീവ് എൻജിനീയർ എൻ.ഇ.സലീം കൺവീനറുമായി 11 അംഗ ടെക്നിക്കൽ കമ്മിറ്റിയാണ് പ്രവർത്തനത്തിന് മേൽനോട്ടം വഹിക്കുന്നത്.