ഗോവ സർക്കാരിൻ്റെ ഗ്രേറ്റ് ഗോവ ഗെയിംസ് ഓൺലൈൻ ലോട്ടറിക്കെതിരെ കേരളം. ലോട്ടറി നടത്തിപ്പിനെതിരെ സംസ്ഥാന നികുതി വകുപ്പ് കേന്ദ്ര ആഭ്യന്തര മന്ത്രാലയത്തിന് കത്തയച്ചു. ലോട്ടറി തടയണം എന്നാണ് കത്തിൽ ആവശ്യപ്പെട്ടിരിക്കുന്നത്. സെക്രട്ടറിതലത്തിൽ ഗോവ സർക്കാരിനും കേന്ദ്രത്തിനും വീണ്ടും കത്തുനൽകും.
സർക്കാർ തലത്തിൽ അനുകൂല നിലപാടുണ്ടായില്ലെങ്കിൽ സുപ്രീംകോടതിയെ സമീപിക്കാനാണ് സംസ്ഥാനത്തിൻ്റെ തീരുമാനം. നേരത്തെ ഇതര സംസ്ഥാനങ്ങളിലെ ലോട്ടറി കേരളത്തിൽ വിൽക്കുന്നതിനെതിരെ സുപ്രീംകോടതിയിൽനിന്ന്‌ അനുകൂല വിധി സമ്പാദിച്ചിരുന്നു. ഈ വിധി ഓൺലൈൻ ലോട്ടറിക്കും ബാധകമാക്കണമെന്നാണ്‌ കേരളത്തിൻ്റെ ആവശ്യം.
വൻ സമ്മാനത്തുകയുമായാണ് ഗോവയുടെ ഓൺലൈൻ ലോട്ടറി വിപണിയിലേക്കെത്തുന്നത്. ഈ ഘട്ടത്തിലാണ് കേരളം ഓൺലൈൻ ലോട്ടറിക്കെതിരെ രംഗത്തെത്തുന്നത്. ഗോവ സർക്കാർ തീരുമാനിച്ചത് കൊണ്ട് അവർക്ക് കേരളത്തിൽ ഓൺലൈൻ ലോട്ടറി നടത്താൻ കഴിയില്ല എന്ന് ഡോ. തോമസ് ഐസക്കും പ്രതികരിച്ചു. കേസ് നടത്തി സുപ്രീംകോടതി അംഗീകരിച്ച കാര്യമാണ്, ഓൺലൈൻ ലോട്ടറിയും പേപ്പർ ലോട്ടറിയും രണ്ടാണ് എന്നും തോമസ് ഐസക് പറഞ്ഞു.
