ബഹുഭാഷാപണ്ഡിതനും വിവർത്തകനും കവിയും ഗാനരചയിതാവുമായിരുന്ന അഭയദേവിൻ്റെ സ്മരണക്കായി ഭാഷാ സമന്വയ വേദി വിവർത്തനത്തിന് നൽകുന്ന 2024 ലെ ഭാഷാ സമന്വയ പുരസ്കാരം ഡോ.ഒ.വാസവന്. പത്രമാസികകളുടെ വിഭാഗത്തിൽ മുംബെയിൽ നിന്ന് പ്രസിദ്ധീകരിക്കുന്ന ഭാരതീയ വിദ്യാഭവൻ്റെ നവനീത് ഹിന്ദി മാസികക്കാണ് പുരസ്കാരം. വിശ്വനാഥ് സച്ദേവാണ് ഇതിൻ്റെ എഡിറ്റർ. മഹർഷി ദയാനന്ദ സരസ്വതിയെ കുറിച്ച് ആചാര്യശ്രീ രാജേഷ് രചിച്ച പുസ്തകത്തിൻ്റെ ഹിന്ദി വിവർത്തനം മഹർഷി ദയാനന്ദ് പ്രതിരോധ് കി ഗഹരായി എന്ന കൃതിക്കാണ് പുരസ്കാരം.
ആകാശവാണിയിൽ ഔദ്യോഗിക ഭാഷാ വിഭാഗം അസിസ്റ്റൻ്റ് ഡയരക്ടറായിരുന്ന ഡോ.ഒ.വാസവൻ മലയാളത്തിൽ നിന്ന് ഹിന്ദിയിലേക്കും ഹിന്ദി, ഇംഗ്ലീഷ് ഭാഷകളിൽ നിന്ന് മലയാളത്തിലേക്കും പുസ്തകങ്ങൾ വിവർത്തനം ചെയ്തിട്ടുണ്ട്. കേന്ദ്ര സർക്കാറിൻ്റെ പബ്ലിക്കേഷൻ ഡിവിഷനു വേണ്ടി പുസ്തകങ്ങൾ വിവർത്തനം ചെയ്തു. ഇംഗ്ലീഷ് – ഹിന്ദി ഭരണഭാഷാ നിഘണ്ടു പ്രസിദ്ധീകരിച്ചിട്ടുണ്ട്. കോഴിക്കോട് പൊയിൽക്കാവ് സ്വദേശിയണ്. ഡോ.സി.രാജേന്ദ്രൻ, ഡോ. പി.കെ.രാധാമണി, ഡോ.ആർസു എന്നിവരടങ്ങിയ സമിതിയാണ് പുരസ്കാര നിർണ്ണയം നടത്തിയത്. പുരസ്കാര സമർപ്പണം 2025 ഫെബ്രുവരി ആദ്യവാരം കോഴിക്കോട് നടക്കും.
