ഭക്ഷ്യസുരക്ഷാ വകുപ്പ് സ്പെഷ്യല് ടാസ്ക് ഫോഴ്സിന്റെ നേതൃത്വത്തില് വടക്കന് കേരളത്തില് കാറ്ററിംഗ് യൂണിറ്റുകള് കേന്ദ്രീകരിച്ച് പരിശോധന നടത്തി. കോഴിക്കോട്, മലപ്പുറം കണ്ണൂര്, വയനാട്, കാസര്കോട് ജില്ലകളിലെ കാറ്ററിംഗ് യൂണിറ്റുകളിലാണ് കഴിഞ്ഞ മൂന്ന് ദിവസങ്ങളായി വ്യാപക പരിശോധനകള് നടത്തിയതെന്ന് ആരോഗ്യ വകുപ്പ് മന്ത്രി വീണാ ജോര്ജ് അറിയിച്ചു.
കാറ്ററിംഗ് യൂണിറ്റുകളിലെ ലൈസന്സ്, ജീവനക്കാരുടെ മെഡിക്കല് ഫിറ്റ്നസ് സര്ട്ടിഫിക്കറ്റുകള്, വെള്ളം പരിശോധിച്ച റിപ്പോര്ട്ട്, പെസ്റ്റ് കണ്ട്രോള് മാനദണ്ഡങ്ങള്, പൊതുവായ ശുചിത്വം, പാചകത്തിനായി ഉപയോഗിക്കുന്ന വസ്തുക്കള്, ഭക്ഷണം ട്രാന്സ്പോര്ട്ട് ചെയ്യുന്ന രീതികള് എന്നിവ പരിശോധനയ്ക്ക് വിധേയമാക്കി. സംസ്ഥാന ഭക്ഷ്യ സുരക്ഷാ കമ്മീഷണറുടെ ഏകോപനത്തില് സ്പെഷ്യല് ടാസ്ക് ഫോഴ്സ് അംഗങ്ങളായ ഭക്ഷ്യ സുരക്ഷാ ജോയിന്റ് കമ്മീഷണര് ജേക്കബ് തോമസ്, ഭക്ഷ്യ സുരക്ഷാ ഡെപ്യൂട്ടി കമ്മിഷണര് അജി. എസ്, ഭക്ഷ്യസുരക്ഷാ അസിസ്റ്റന്റ് കമ്മിഷണര് സക്കീര് ഹുസൈന്, എഫ്.എസ്.ഒ ജോസഫ് കുര്യാക്കോസ് എന്നിവരുടെ നേതൃത്വത്തിലായിരുന്നു പരിശോധന.
