രാജ്യത്ത് ഇത്തവണ കാലവർഷം സാധാരണയിലും കുറയാൻ സാധ്യതയെന്ന് സ്വകാര്യ കാലാവസ്ഥാ ഏജൻസിയായ സ്കൈമെറ്റിന്റെ മുന്നറിയിപ്പ്. പസഫിക് സമുദ്രത്തിലെ താപനില വർധിക്കുന്ന ‘എൽ നിനോ’ പ്രതിഭാസം മഴയെ പ്രതികൂലമായി ബാധിക്കുമെന്ന് ഏജൻസിയുടെ ആദ്യഘട്ട വിലയിരുത്തൽ. എന്നാൽ, ദേശീയതലത്തിൽ മഴ കുറയുമെങ്കിലും കേരളത്തിൽ ഇത്തവണ സാധാരണ തോതിലുള്ള മഴ ലഭിക്കും.
അതേസമയം, അറബിക്കടലിലെ അനുകൂല ഘടകങ്ങൾ കേരളത്തിന് തുണയാകുമെന്നാണ് കരുതുന്നത്. ഇന്ത്യൻ മഹാസമുദ്രം ഡൈപോൾ (IOD) പോസിറ്റീവ് ആകാനുള്ള സാധ്യത നിലനിൽക്കുന്നതിനാൽ കാലവർഷത്തിന്റെ ആദ്യഘട്ടത്തിൽ മികച്ച മഴ ലഭിച്ചേക്കാം. സമുദ്രത്തിന്റെ പടിഞ്ഞാറൻ ഭാഗത്ത് ചൂട് കൂടുകയും കിഴക്കൻ ഭാഗത്ത് കുറയുകയും ചെയ്യുന്ന ഈ അവസ്ഥ മഴമേഘങ്ങളുടെ രൂപീകരണത്തെ സഹായിക്കുന്നതാണ്.
ജൂൺ മുതൽ സെപ്റ്റംബർ വരെയുള്ള മാസങ്ങളിൽ രാജ്യത്ത് മഴയുടെ അളവ് കുറയാനുള്ള പ്രധാന കാരണം എൽ നിനോയുടെ സാന്നിധ്യമാണ്. സമുദ്രോപരിതലം അസാധാരണമാംവിധം ചൂടാകുന്ന ഈ പ്രതിഭാസം അതിതീക്ഷ്ണമായ ‘സൂപ്പർ എൽ നിനോ’ ആയി മാറാനുള്ള സാധ്യതയും അന്താരാഷ്ട്ര കാലാവസ്ഥാ ഏജൻസികൾ പ്രവചിക്കുന്നുണ്ട്. ഇത് കാലവർഷത്തിന്റെ രണ്ടാം പകുതിയിൽ മഴ ഗണ്യമായി കുറയാൻ ഇടയാക്കും.
