തിരുവനന്തപുരം: വോട്ടർപ്പട്ടികയുടെ തീവ്രപരിഷ്കരണ പ്രക്രിയയുടെ ഭാഗമായി സംസ്ഥാനത്തുടനീളം നടക്കുന്ന ഹിയറിംഗുകളുടെ അടിസ്ഥാനത്തിൽ ഇതുവരെ 21,130 പേർ വോട്ടർപ്പട്ടികയിൽ നിന്ന് ഒഴിവാക്കിയതായി മുഖ്യ തെരഞ്ഞെടുപ്പ് ഓഫീസർ ഡോ. രത്തൻ യു. കേൽക്കർ അറിയിച്ചു. ഇവരിൽ 2,804 പേർ എന്യൂമറേഷൻ കാലയളവിൽ മരണപ്പെട്ടവരും, 1,039 പേർ വിദേശ പൗരത്വം നേടിയവരും, 17,287 പേർ താമസം മാറ്റിയവരുമാണെന്ന് വ്യക്തമാക്കി.
മതിയായ കാരണങ്ങൾ പരിശോധിച്ച് കൃത്യമായ പരിശോധനയിലൂടെ മാത്രമാണ് ഒഴിവാക്കലുകൾ നടത്തിയതെന്നും ഹിയറിംഗുകൾ തുടരുന്നതിനാൽ കണക്കിൽ മാറ്റങ്ങൾ വരാനിടയുണ്ടെന്നും അദ്ദേഹം കൂട്ടിച്ചേർത്തു. ഹിയറിംഗിനിടെ അനർഹരായി കണ്ടെത്തപ്പെടുന്നവർ തുടർന്നും പട്ടികയിൽ നിന്ന് നീക്കം ചെയ്യപ്പെടുമെന്നും അറിയിച്ചു.
അതേസമയം, കേരളം ഉൾപ്പെടെ അഞ്ചു സംസ്ഥാനങ്ങളിലെ നിയമസഭ തെരഞ്ഞെടുപ്പിനായി തെരഞ്ഞെടുപ്പ് കമ്മീഷൻ നിരീക്ഷകരെ നിയോഗിച്ചു. നിരീക്ഷകർക്കുള്ള പരിശീലനം ദില്ലിയിൽ ആരംഭിച്ചു. സ്വതന്ത്രവും നിഷ്പക്ഷവും സുതാര്യവുമായ തെരഞ്ഞെടുപ്പ് ഉറപ്പാക്കേണ്ടതിന്റെ പ്രാധാന്യം മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാർ ഊന്നിപ്പറഞ്ഞു. ആകെ 1,444 ഉദ്യോഗസ്ഥരെയാണ് നിരീക്ഷകരായി നിയമിച്ചിരിക്കുന്നത് — 714 പൊതുനിരീക്ഷകർ, 233 പൊലീസ് നിരീക്ഷകർ, 497 തെരഞ്ഞെടുപ്പ് ചെലവ് നിരീക്ഷകർ എന്നിവർ വിവിധ സംസ്ഥാനങ്ങളിലേക്ക് നിയോഗിക്കപ്പെടും. എസ്.ഐ.ആർ ഉൾപ്പെടെയുള്ള വിഷയങ്ങളിൽ നിരീക്ഷകർക്ക് ഉദ്യോഗസ്ഥർ വിശദീകരണം നൽകി.
ഇതിനിടെ, എസ്.ഐ.ആർ നടപടികൾ മത ന്യൂനപക്ഷങ്ങളിൽ ആശങ്ക സൃഷ്ടിക്കുന്നുവെന്ന വിലയിരുത്തലിനെ തുടർന്ന്, ആശങ്ക അകറ്റാൻ ‘നേറ്റിവിറ്റി കാർഡ്’ പദ്ധതി പ്രഖ്യാപിക്കുമെന്ന് സംസ്ഥാന ധനമന്ത്രി കെ. എൻ. ബാലഗോപാൽ അറിയിച്ചു. ഇതിനായി പ്രത്യേക നിയമനിർമ്മാണം കൊണ്ടുവരുമെന്നും മന്ത്രി പറഞ്ഞു. മതസാമുദായിക സൗഹൃദം ശക്തിപ്പെടുത്തുന്നതിനായി ബജറ്റിൽ 10 കോടി രൂപ മാറ്റിവെക്കുന്നതായും അദ്ദേഹം അറിയിച്ചു.
