ഡിസംബർ പകുതിആയതോടെ മൂന്നാറിൽ സീസണിലെ ഏറ്റവും താഴ്ന്ന താപനിലയായ മൂന്ന് ഡിഗ്രി സെൽഷ്യസ് ഇന്നലെ രേഖപ്പെടുത്തി. നല്ലതണ്ണി, തെന്മല, ചിറ്റുവര, ചെണ്ടുവര എസ്റ്റേറ്റിലെ ലോവർ ഡിവിഷൻ എന്നിവിടങ്ങളിലാണ് താപനില ഇന്നലെ രാവിലെ മൂന്നു ഡിഗ്രി സെൽഷ്യസിലെത്തിയത്. അതിശൈത്യം മൂലം മൂന്നാർ ടൗണും സമീപത്തെ പുൽമേടുകളും മഞ്ഞിൽ പുതഞ്ഞ നിലയിലാണ്.
രാവിലെ പുൽമേടുകളിലെല്ലാം കട്ടിയുള്ള മഞ്ഞ് പാളികൾ രൂപപ്പെട്ടു. ഈ പ്രതിഭാസം കാണാൻ നിരവധി സഞ്ചാരികളാണ് അതിരാവിലെ തന്നെ തണുപ്പിലേക്ക് ഇറങ്ങിയത്. . ലക്ഷ്മി എസ്റ്റേറ്റിലും ചൊക്കനാടും താപനില 4 ഡിഗ്രി സെൽഷ്യസ് ആയി കുറഞ്ഞു.
സെവൻമലയിൽ 5 ഡിഗ്രി സെൽഷ്യസ് ആണ് രേഖപ്പെടുത്തിയത്. മഴ പൂർണ്ണമായും ഒഴിഞ്ഞതോടെ തെളിഞ്ഞ കാലാവസ്ഥ തണുപ്പിന്റെ തീവ്രത കൂട്ടി. വരും ദിവസങ്ങളിൽ താപനില താഴാൻ സാധ്യതയുണ്ടെന്നാണ് കാലാവസ്ഥാ നിരീക്ഷണ വിദഗ്ദ്ധർ പ്രതീക്ഷിക്കുന്നത്. ക്രിസ്മസ്, പുതുവത്സര അവധിക്കാലം ആരംഭിച്ചതോടെ ഈ അതിശൈത്യം ആസ്വദിക്കാനായി മൂന്നാറിലേക്ക് സഞ്ചാരികളുടെ വൻ തിരക്കാണ് അനുഭവപ്പെടുന്നത്. തണുപ്പുകാല യാത്ര ഇഷ്ടപ്പെടുന്നവർക്ക് മൂന്നാറിലെ ഈ കാലാവസ്ഥ സുവർണ്ണാവസരമാണ്
