വിവിധ മേഖലകളില് പ്രഗത്ഭരായ കേരളത്തില് നിന്നുള്ള ഗോത്രവര്ഗ കലാകാരന്മാര്ക്ക് മേഘാലയ ചീഫ് സെക്രട്ടറി വരവേല്പ്പ് നൽകി. ലോക പ്രസിദ്ധമായ ഹോണ്ബില് ഉത്സവത്തില് പങ്കെടുക്കാനാണ് ഗോത്രവര്ഗ കലാകാരന്മാര് ഷില്ലോങിലെത്തിയത്. മലയാളിയായ ഐഎഎസ് ഉദ്യോഗസ്ഥന് ഷക്കീല് അഹമ്മദാണ് ഇപ്പോള് മേഘാലയയുടെ ചീഫ് സെക്രട്ടറി. അദ്ദേഹമാണ് ഹോണ്ബില് ഉത്സവത്തിനെത്തിയ കേരളസംഘത്തെ ഷില്ലോങിലേക്ക് വരവേറ്റത്. ഗോത്രാചാരപ്രകാരമുള്ള ആദരവും സംഘാംഗങ്ങള് മലയാളി ചീഫ് സെക്രട്ടറിക്ക് നല്കി. കേരളത്തില് നിന്നും തെരഞ്ഞെടുക്കപ്പെട്ട പതിനഞ്ചോളം കലാകാരന്മാരാണ് ഷിലോങിലെത്തിയിരിക്കുന്നത്.
ഗോത്രവർഗ മന്ത്രാലയത്തിന്റെ പദ്ധതിയുടെ ഭാഗമായാണ് കേരളത്തിലെ വിവിധ മേഖലകളിൽ നിന്നും ഗോത്രകലാകാരന്മാര്ക്ക് ഹോണ്ബില് ഉത്സവത്തില് കലാപരിപാടികള് അവതരിപ്പിക്കാന് ക്ഷണം ലഭിച്ചത്. യാത്രയ്ക്കിടെ കേരളസംഘം ഇതോടൊപ്പം അസമിലും നാഗലാന്റിലും സന്ദര്ശനം നടത്തുകയും കലാപരിപാടികള് അവതരിപ്പിക്കുകയും ചെയ്തു. അസമില് ഒരു നൂറ്റാണ്ടിലേറെ പഴക്കമുള്ള കോട്ടൺ യൂണിവേഴ്സിറ്റിയിലാണ് കേരളത്തിലെ കലാകാരന്മാര് യാത്രയ്ക്കിടെ ആദ്യം പരിപാടികള് അവതരിപ്പിച്ചത്. പിന്നീട് ആസാം ഗോത്രവർഗ്ഗ ഗവേഷണ കേന്ദ്രത്തിലും ബ്രഹ്മപുത്ര തീരത്തും കലാപരിപാടികൾ അരങ്ങേറി. തുടര്ന്നാണ് ഹോണ്ബില് ഉത്സവവേദിയിലേക്ക് കേരളത്തിലെ കലാകാരന്മാര് എത്തിയത്. ചലച്ചിത്ര അവാർഡ് ജേതാവും ഗായികയുമായ നഞ്ചിയമ്മ, ചിക്കിമല്ലന്, കെ എസ് മല്ലന്, സുലോചന കാണി, ച്യേമി ചീങ്കീറ്ൾ, തങ്കമണി കാളൻ തുടങ്ങിയവര് ഉള്പ്പെടെയുള്ളവരാണ് സംഘത്തിലുള്ളത്. കിര്ത്താഡ്സ് ഉദ്യോഗസ്ഥരും സംഘത്തിലുണ്ട്.
