ദീർഘദൂര ട്രെയിൻ യാത്രകളിൽ സ്ലീപ്പർ ക്ലാസ് യാത്രക്കാർക്ക് പണം നൽകി ഉപയോഗിക്കാവുന്ന അണുവിമുക്തമാക്കിയ ‘ബെഡ് റോളുകൾ’ അടുത്ത വർഷം ജനുവരി 1 മുതൽ നൽകുമെന്ന് ദക്ഷിണ റെയിൽവേയുടെ ചെന്നൈ ഡിവിഷൻ അറിയിച്ചു.
കേരളത്തിൽനിന്നുള്ള യാത്രക്കാർക്ക് ഏറെ പ്രയോജനകരമാകുന്ന ഈ സൗകര്യം ആദ്യഘട്ടത്തിൽ നടപ്പിലാക്കുന്ന ട്രെയിനുകളുടെ പട്ടികയിൽ മൂന്ന് കേരള സർവീസുകൾ ഉൾപ്പെടുത്തിയിട്ടുണ്ട്: 22651/22652 ചെന്നൈ-പാലക്കാട് എക്സ്പ്രസ്, 12695/12696 ചെന്നൈ സെൻട്രൽ–തിരുവനന്തപുരം എക്സ്പ്രസ്, 22639/22640 ചെന്നൈ-ആലപ്പുഴ എക്സ്പ്രസ് എന്നിവയാണവ.
ഈ പദ്ധതി പ്രകാരം, ഒരു ബെഡ്ഷീറ്റ്, തലയിണ, തലയിണ കവർ എന്നിവ അടങ്ങുന്ന ഫുൾ ബെഡ് റോൾ 50 രൂപയ്ക്ക് വാടകയ്ക്ക് ലഭിക്കും. തലയിണയും തലയിണ കവർ മാത്രമായി ആവശ്യമുള്ളവർക്ക് 30 രൂപയും, ഒറ്റ ബെഡ്ഷീറ്റ് മാത്രം ആവശ്യമുള്ളവർക്ക് 20 രൂപയുമാണ് നൽകേണ്ടത്. ഈ നീക്കത്തെ യാത്രക്കാരുടെ സംഘടനകൾ സ്വാഗതം ചെയ്തു. ചെന്നൈയിലേക്കോ മംഗളൂരുവിലേക്കോ യാത്ര ചെയ്യുന്നവർക്ക് ഇത് ഏറെ സഹായകമാകും. എ.സി. കോച്ചുകളിലെ പോലെ ബെഡ്ഷീറ്റ്, തലയിണ, പുതപ്പ് എന്നിവയുടെ ഫീസ് യാത്രാക്കൂലിയുടെ കൂടെ നിർബന്ധിതമായി ഈടാക്കുന്നില്ല എന്നതും ഈ പുതിയ പദ്ധതിയുടെ പ്രധാന ഗുണമായി യാത്രക്കാർ ചൂണ്ടിക്കാട്ടുന്നു.
