കൊയിലാണ്ടി ഉപജില്ല കലോത്സവം 2025 നവംബർ 4 മുതൽ 7 വരെ തിരുവങ്ങൂർ ഹയർ സെക്കൻഡറി സ്കൂളിൽ നടക്കും. മേളയുടെ ഒരുക്കങ്ങൾ പൂർത്തിയായി. കലോത്സവത്തിന്റെ രജിസ്ട്രേഷൻ നവംബർ 3 ന് തിങ്കളാഴ്ച രാവിലെ 11 മണി മുതൽ കൊയിലാണ്ടി എ ഇ ഒ ഓഫീസിൽ നടക്കും. 12 വേദികളിലായി എൽ പി, യു പി, ഹൈസ്കൂൾ, ഹയർ സെക്കൻഡറി വിഭാഗങ്ങളിലെ 6000 ത്തിലധികം പ്രതിഭകൾ മാറ്റുരക്കും. നാലു വേദികളിലായി 15,000ത്തിലധികം പേർക്ക് വിഭവസമൃദ്ധമായ ഭക്ഷണം വിളമ്പും. നവംബർ 4 ന്ഓഫ് സ്റ്റേജ് മത്സരമാണ് നടക്കുക. 5 ന് വൈകുന്നേരം 5 മണിക്ക് ഉദ്ഘാടന സമ്മേളനം നടക്കും. കൊയിലാണ്ടി നഗരസഭ ചെയർപേഴ്സൺ സുധാ കിഴക്കേ പാട്ട് ഉദ്ഘാടനം ചെയ്യും. സ്വാഗതസംഘം ചെയർപേഴ്സൺ അധ്യക്ഷത വഹിക്കും. ജനറൽ കൺവീനർ ടി കെ ഷെറീന സ്വാഗതം ആശംസിക്കും. എ ഇ ഒ എംകെ മഞ്ജു മേളയുടെ വിശദീകരണം നടത്തും.
7ന് വൈകുന്നേരം 6 ന് സമാപന സമ്മേളനം വനംവകുപ്പ് മന്ത്രി എം കെ ശശീന്ദ്രൻ ഉദ്ഘാടനം ചെയ്യും. എംകെ രാഘവൻ എം പി മുഖ്യ അതിഥിയാവും. ജില്ലാ പഞ്ചായത്ത് വൈസ് പ്രസിഡണ്ട് അഡ്വ: പി ഗവാസ് സമ്മാനവിതരണം നടത്തും. മുൻമന്ത്രി പി കെ കെ ബാവ സാഹിബ് വിവിധ ഗ്രാമപഞ്ചായത്തുകളുടെ പ്രസിഡണ്ടുമാർ, മറ്റു ജനപ്രതിനിധികൾ എന്നിവർ സംസാരിക്കും.
ഈ വർഷം എൽപി, യുപി, ഹൈസ്കൂൾ, ഹയർ സെക്കൻഡറി വിഭാഗങ്ങളിൽ കൂടുതൽ പോയിന്റുകൾ നേടുന്ന വിദ്യാലയത്തിന് പുതുതായി ഒരു ഓവറോൾ ട്രോഫി കൂടി നൽകുന്നുണ്ട്. തിരുവങ്ങൂർ ഹയർ സെക്കൻഡറി സ്കൂൾ നൂറാം വാർഷികത്തോടനുബന്ധിച്ച് സ്ഥാപക മാനേജർ ടി കെ ഗോവിന്ദൻ നായരുടെ ഓർമ്മയ്ക്കായാണ് പുതിയ ട്രോഫി നൽകുന്നത്. വിദ്യാഭ്യാസത്തിൻ്റെ പരമ ലക്ഷ്യം നേടിയെടുക്കുന്നതിന് സർഗാത്മക പ്രവർത്തനങ്ങളുടെ പങ്ക് വളരെ വലുതാണെന്നാണ് മേളകൾ നൽകുന്ന സന്ദേശം. മാനവികതയുടെയും ജനകീയ സംഘാടനത്തിന്റെയും അരങ്ങായി ഈ കലോത്സവത്തെ മാറ്റാനുള്ള തയ്യാറെടുപ്പിലാണ് സംഘാടകസമിതി. മേളയുടെ വിജയത്തിനായി വിവിധ സബ് കമ്മിറ്റികൾ ഊർജജസ്വലമായ പ്രവർത്തനത്തിലാണ്.
സ്വാഗതസംഘം ജനറൽ കൺവീനർ ടി കെ ഷെറീന സ്കൂൾ പ്രധാനധ്യാപിക കെ കെ വിജിത, പി ടി എ പ്രസിഡണ്ട് കെ കെ ഫാറൂഖ്, പബ്ലിസിറ്റി കൺവീനർ ഇസ്മയിൽ കിഴ്പ്പോട്ട്, ചെയർമാൻ വി ശരീഫ് കാപ്പാട്, എച്ച് എം ഫോറം കൺവീനർ എൻ ഡി പ്രജീഷ്, ഗണേശ് കക്കഞ്ചേരി എന്നിവർ വാർത്താ സമ്മേളനത്തിൽ പങ്കെടുത്തു.
