കൊയിലാണ്ടി നഗരസഭാ ഭരണം പിടിച്ചെടുക്കും,യു ഡി എഫ് ഒറ്റക്കെട്ടായി രംഗത്തിറങ്ങാന്‍ തീരുമാനം

കൊയിലാണ്ടി: ഇടത് ദുര്‍ഭരണത്തില്‍ നിന്ന് കൊയിലാണ്ടി നഗരസഭ ഭരണം പിടിച്ചെടുക്കാന്‍ ഒറ്റക്കെട്ടായി രംഗത്തിറങ്ങാന്‍ യു ഡി എഫ് പ്രവര്‍ത്തക കണ്‍വെന്‍ഷന്‍ തീരുമാനം. കഴിഞ്ഞ 30 വര്‍ഷത്തെ ഭരണം കൊണ്ട് കൊയിലാണ്ടിയെ വികസനത്തിന്റെ കാര്യത്തില്‍ പിന്നാക്കം എത്തിച്ചിരിക്കുകയാണ് എല്‍ ഡി എഫ് എന്ന് കണ്‍വെന്‍ഷന്‍ ഉദ്ഘാടനം ചെയ്ത ഡി.സി.സി പ്രസിഡന്റ് അഡ്വ കെ പ്രവീണ്‍ കുമാര്‍ കുറ്റപ്പെടുത്തി. അഴിമതിയും സ്വജനപക്ഷപാദവും ആണ് ഇടത് ഭരണത്തിന്റെ മുഖമുദ്ര. നഗര ഭരണത്തിലെ ക്രമക്കേടുകള്‍ ഓഡിറ്റ് റിപ്പോര്‍ട്ടില്‍ അക്കമിട്ട് നിരത്തിയിരിക്കുകയാണ്. വികസന കാഴ്ചപ്പാടില്ലാത്ത എല്‍ ഡി എഫ് ഭരണത്തിനെതിരെ ജനങ്ങളുടെ മുന്നില്‍ യു ഡി എഫ് കുറ്റപത്രം സമര്‍പ്പിക്കും. കഴിഞ്ഞ നഗരസഭ തിരഞ്ഞെടുപ്പില്‍ നിസ്സാര വോട്ടുകള്‍ക്ക് പരാജയപ്പെട്ട വാര്‍ഡുകളില്‍ കൂടുതല്‍ ജാഗ്രതയോടെ പ്രവര്‍ത്തിക്കണമെന്ന് പ്രവീണ്‍ കുമാര്‍ ആവശ്യപ്പെട്ടു. കൊയിലാണ്ടി നഗരസഭയില്‍ ഭരണത്തിലെത്തിയാല്‍ വരുന്ന നിയമസഭാ തിരഞ്ഞെടുപ്പില്‍ അത്യുഗ്ര വിജയം നേടാന്‍ യു ഡി എഫിനാകുമെന്ന് പ്രവീണ്‍ കുമാര്‍ പറഞ്ഞു. നഗരസഭാ തെരഞ്ഞെടുപ്പുമായി ബന്ധപ്പെട്ട മുന്നൊരുക്കങ്ങള്‍ കണ്‍വെന്‍ഷന്‍ ചര്‍ച്ച ചെയ്തു. അന്‍വര്‍ ഇയ്യഞ്ചേരി അധ്യക്ഷനായി. മുസ്ലിം ലീഗ് ജില്ലാ ജനറല്‍ സെക്രട്ടറി ടി.ടി ഇസ്മായില്‍,കെ പി സി സി മെംബറും നഗരസഭ പ്രതിപക്ഷ നേതാവുമായ പി.രത്‌നവല്ലി ,പ്രതിപക്ഷ ഉപനേതാവ് വി.പി ഇബ്രാഹിംകുട്ടി, അഡ്വ കെ.വിജയന്‍,മഠത്തില്‍ അബ്ദുറഹിമാന്‍,സി.കെ ബാബു, സി.ഹനീഫ ,മുരളീധരന്‍ തോറോത്ത്,കെ.പി വിനോദ്കുമാര്‍,വി.വി സുധാകരന്‍,വി.ടി.സുരേന്ദ്രന്‍ എന്നിവര്‍ സംസാരിച്ചു.