തിരുവനന്തപുരം:56-ാമത് ജി.എസ്.ടി കൗൺസിൽ യോഗത്തിലെ തീരുമാനങ്ങൾ പ്രകാരം സംസ്ഥാന സർക്കാർ പുറപ്പെടുവിച്ച വിജ്ഞാപനങ്ങളനുസരിച്ച്, ഒട്ടനവധി സാധനങ്ങളുടെയും സേവനങ്ങളുടെയും നികുതി നിരക്കുകളിൽ മാറ്റം വരുത്തിയിട്ടുണ്ട്. പുതുക്കിയ നിരക്കുകൾ സെപ്റ്റംബർ 22 മുതൽ പ്രാബല്യത്തിൽ വരും.
അവശ്യസാധനങ്ങൾക്കും ദൈനംദിന ആവശ്യങ്ങൾക്കും ഉപയോഗിക്കുന്ന ചില ഉൽപ്പന്നങ്ങളുടെ നികുതി നിരക്ക് കുറയുമെന്നാണ് കൗൺസിൽ വിലയിരുത്തുന്നത്.
വ്യാപാരികൾ/സേവനദാതാക്കൾ ചെയ്യേണ്ട കാര്യങ്ങൾ:
പുതുക്കിയ നികുതി നിരക്കനുസരിച്ചുള്ള ബില്ലിംഗ് സോഫ്റ്റ്‌വെയർ മാറ്റങ്ങൾ നടപ്പാക്കണം.
സെപ്റ്റംബർ 21 ലെ ക്ലോസിങ് സ്റ്റോക്ക് രേഖപ്പെടുത്തിവയ്ക്കണം.
നികുതി കുറവിന്റെ ഗുണഫലം ഉപഭോക്താക്കൾക്ക് കൈമാറണം.
നികുതി ബാധ്യത ഒഴിവാക്കിയ സാധനങ്ങളുടെയോ സേവനങ്ങളുടെയോ ഇൻപുട്ട് ടാക്‌സ് ക്രെഡിറ്റ് റിവേഴ്‌സൽ നടപടികൾ സ്വീകരിക്കണം.
സിഗരറ്റ്-ഗുഡ്ക-പാൻമസാലയ്ക്ക് മാറ്റം ഉടൻ ഇല്ല
സിഗരറ്റ്, ബീഡി, ഗുഡ്ക, പാൻമസാല മുതലായവയുടെ നികുതി നിരക്ക് 40 ശതമാനമായി ഉയർത്താൻ കൗൺസിൽ തീരുമാനിച്ചെങ്കിലും ഇത് സെപ്റ്റംബർ 22 മുതൽ ബാധകമല്ല. പിന്നീട് പ്രത്യേകം വിജ്ഞാപനത്തിലൂടെ മാത്രമേ നടപ്പിലാക്കൂ.
വ്യാപാരികൾ സ്വീകരിക്കേണ്ട നടപടികളുമായി ബന്ധപ്പെട്ട വിജ്ഞാപനങ്ങൾ സംസ്ഥാന ചരക്ക് സേവന നികുതി വകുപ്പിന്റെ വെബ്‌സൈറ്റിൽ (www.keralataxes.gov.in) ലഭ്യമാണ്.
