ജീവകാരുണ്യ സാമൂഹ്യ രംഗത്ത് ഉനൈസയിലെ സജ്ജീവ സാന്നിധ്യമായ ഒ ഐ സി സി ഉനൈസ ഘടകം അതിൻ്റെ എട്ടാം വാർഷികവും ഓണാഘോഷവും അതിവിശാലമായ രീതിയിൽ ആഘോഷിച്ചു. സെപ്റ്റംബർ 11 വ്യാഴാഴ്ച ഉനൈസയിലെ അൽ ഹജബ് ഓഡിറ്റോറിയത്തിൽ വെച്ച് നടന്ന സാംസ്കാരിക സമ്മേളനം ഒ ഐ സി സി സൗദി നാഷണൽ കമ്മിറ്റി പ്രസിഡൻ്റ് ബഹുമാനപ്പെട്ട ബിജു കല്ലുമല ഉദ്ഘാടനം നിർവഹിച്ചു. ഓ ഐ സി സി ഉനൈസ സെക്രട്ടറി വിശ്വനാഥൻ കാളികാവ് സ്വാഗതം പറഞ്ഞ ചടങ്ങിൽ പ്രസിഡൻ്റ് സാലി കരുവാറ്റ അദ്ധ്യക്ഷതയും മുൻ സെക്രട്ടറി അഷ്റഫ് വിളക്കുടി സംഘടനാ റിപ്പോർട്ടും മുൻ പ്രസിഡൻ്റ് പ്രിൻസ് ജോസഫ് നന്ദിയും പറഞ്ഞു.
ഓ ഐ സി സി സൗദി നാഷണൽ കമ്മിറ്റി പ്രസിഡൻ്റ് ബഹുമാനപ്പെട്ട ബിജു കല്ലുമല, ഒ ഐ സി സി ബുറൈദ രക്ഷാധികാരി സക്കീർ പത്തറ, കെ എം സി സി ഉനൈസ പ്രസിഡൻ്റ് ജംഷീർ മങ്കട, കനിവ് ജീവകാരുണ്യ സംഘടനയുടെ മെഡിക്കൽ വിങ്ങ് ചെയർമാൻ ഡോക്ടർ ലൈജു, ഇന്ത്യൻ എംബസി വളണ്ടിയർ ഹരിലാൽ, പ്രവാസി സംഘം സെക്രട്ടറി നൗഷാദ്, ഉനൈസ കിങ്ങ് സൗദ് ആശുപത്രിയിലെ സീനിയർ നഴ്സ് സൂപ്രണ്ട് തങ്കമ്മ ചാക്കോ, കിങ്ങ് സൗദ് ആശുപത്രിയിലെ ഇന്റൻസീവ് കെയർ യൂണിറ്റ് നേഴ്സ് ഇൻചാർജ് മീന പല്ലാഴി, ദീർഘ കാലത്തെ പ്രവാസ ജീവിതം അവസാനിപ്പിച്ച് നാട്ടിലേക്ക് മടങ്ങുന്ന ഉനൈസ ഒ ഐ സി സി യുടെ മുൻപ്രസിഡൻ്റ് പ്രിയപ്പെട്ട പ്രിൻസ് ജോസഫ് എന്നിവരെ ചടങ്ങിൽ ആദരിച്ചു.
ഒ ഐ സി സി ബുറൈദ സെന്റ്രൽ കമ്മിറ്റിയെ പ്രതിനിധീകരിച്ച് പ്രമോദ് കുര്യനും, പി പി അഷ്റഫ് കോഴിക്കോടും, ഉനൈസ കെ എം സി സി യുടെ ജനറൽ സെക്രട്ടറി സെയ്യദ് ഷുഹൽ തങ്ങളും, പ്രവാസി സംഘം ഉനൈസയുടെ ബാബു കിളിമാനൂരും ആശംസ പ്രസംഗം നടത്തി. പ്രവാസികളുടെ ആരോഗ്യ സംരക്ഷണത്തെ കുറിച്ച് ഡോക്ടർ ലൈജു നയിച്ച ആരോഗ്യ ബോധവൽക്കരണ ക്ളാസും, പ്രാദേശിക കലാകാരന്മാരും കൊച്ചു കുട്ടികളും അവതരിപ്പിച്ച വിവിധ കലാപരിപാടികളും, ഗാനമേളയും പരിപാടി വർണ്ണാഭമാക്കി.
