തിരുവനന്തപുരം : തിരുവനന്തപുരം പൊലീസ് സഹകരണ സംഘം സംസ്ഥാനത്ത് തന്നെ സുരക്ഷിതമായ സഹകരണ ബാങ്കായി മാറി. 1978-ൽ ചെറിയ തുടക്കത്തിൽ നിന്നുയർന്ന സംഘം ഇന്ന് 400 കോടി രൂപയുടെ നിക്ഷേപവും 370 കോടി വായ്പയും കൈകാര്യം ചെയ്യുന്നു. അംഗങ്ങൾ മുഴുവൻ പൊലീസുകാരായതിനാൽ വിശ്വാസ്യതയും സാമ്പത്തിക അച്ചടക്കവുമാണ് വളർച്ചയുടെ അടിസ്ഥാനം.
സഹകരണ ബാങ്ക് മാത്രമല്ല, സംഘം സാമൂഹ്യസേവനത്തിന്റെയും വ്യാപാരത്തിന്റെയും വഴികളിലും മാതൃകയായി. നന്ദാവനത്ത് പ്രവർത്തിക്കുന്ന സഹകരണ സൂപ്പർ ബസാർ വഴി പൊതുജനങ്ങൾക്കും 40 ശതമാനം വരെ വിലക്കിഴിവിൽ സാധനങ്ങൾ ലഭ്യമാക്കുന്നു. സ്കൂൾ മാർക്കറ്റുകളിൽ കുട്ടികൾക്കാവശ്യമായ പുസ്തകങ്ങളും ഉപകരണങ്ങളും 60–70 ശതമാനം വിലക്കിഴിവിൽ ലഭിക്കും. മെഡിക്കൽ സ്റ്റോറിൽ 20 മുതൽ 80 ശതമാനം വരെ വിലക്കിഴിവിൽ മരുന്നുകളും ലഭ്യമാണ്. കിടപ്പുരോഗികൾക്ക് 5 കിലോമീറ്റർ പരിധിയിൽ സൗജന്യ ഹോം ഡെലിവറിയും ബാങ്ക് ഒരുക്കുന്നു.
ദിവസം 10 ലക്ഷം രൂപയുടെ വ്യാപാരമാണ് സൂപ്പർ ബസാറിൽ നടക്കുന്നത്. അടുത്തിടെ നെടുമങ്ങാട്, നെയ്യാറ്റിൻകര, ആറ്റിങ്ങൽ എന്നിവിടങ്ങളിലും ശാഖകൾ തുടങ്ങും. ബാങ്കിങ് ലാഭം വെറുതെ സൂക്ഷിക്കാതെ ലാഭകരമായ പദ്ധതികളിൽ നിക്ഷേപിക്കുന്നതും അംഗങ്ങളുടെ ക്ഷേമത്തിനുള്ള മുൻഗണനയുമാണ് വിജയത്തിന്റെ രഹസ്യം.
