പൂഴിത്തോട് പടിഞ്ഞാറെത്തറ റോഡിന്റെ സർവ്വേ നടപടികൾ അടിയന്തരമായി പൂർത്തിയാക്കണം: ഷാഫി പറമ്പിൽ എംപി

കോഴിക്കോട് വയനാട് ജില്ലകളെ ബന്ധിപ്പിക്കുന്നതും ചുരം ഇല്ലാത്തതുമായ പൂഴിത്തോട് പടിഞ്ഞാറെത്തറ റോഡിന്റെ സർവ്വേ നടപടികൾ അടിയന്തിരമായി പൂർത്തിയാക്കണമെന്ന് ഷാഫി പറമ്പിൽ എംപി ആവശ്യപ്പെട്ടു. കഴിഞ്ഞ മൂന്ന് പതിറ്റാണ്ട് കാലമായി വിവിധ കാരണങ്ങളാൽ തടസ്സപ്പെട്ടു കിടക്കുകയായിരുന്ന ഈ പദ്ധതിയുടെ നിർവഹണം, താമരശ്ശേരി ചുരത്തിൽ അനുഭവപ്പെടുന്ന ഗതാഗത പ്രതിസന്ധി മറികടക്കാൻ അനിവാര്യമാണ്. വനമേഖലയിലെ സർവ്വേ നടപടികൾക്ക് ഡ്രോൺ ഉപയോഗത്തിന് മാത്രമേ അനുമതിയുള്ളൂ എന്നത്, സർവ്വേ നടപടികളുടെ ഉപയോഗക്ഷമത സംബന്ധിച്ച് ജനങ്ങൾക്കിടയിൽ ആശങ്ക സൃഷ്ടിച്ചിട്ടുണ്ട്. സർവ്വേ പൂർത്തിയാക്കാൻ വനം വകുപ്പ് അനുവദിച്ച സമയപരിധി അവസാനിക്കാറായ അവസരത്തിൽ സാങ്കേതിക പ്രശ്നങ്ങളിൽ കുരുങ്ങി സർവ്വേ പ്രവർത്തനം തടസ്സപ്പെടാതിരിക്കാൻ അധികൃതർ പ്രത്യേകം ശ്രദ്ധിക്കണം എന്ന് എം പി ആവശ്യപ്പെട്ടു. ജിപിഎസ് സർവ്വേ അനിവാര്യമാണെങ്കിൽ അതിനുള്ള അനുമതി ലഭ്യമാക്കണമെന്ന് ആവശ്യപ്പെട്ടുകൊണ്ട് ചീഫ് കൺസർവേറ്റർ ഓഫ് ഫോറസ്റ്റിന് എംപി കത്തു നൽകി.