ഹർഷിനക്കൊപ്പം യുഡിഎഫ് ഉണ്ട്; ഉറപ്പു നൽകി പ്രതിപക്ഷ നേതാവ് വി.ഡി.സതീശൻ

 കോഴിക്കോട് : ശസ്ത്രക്രിയയ്ക്കിടെ വയറ്റിൽ കത്രിക കുടുങ്ങി വർഷങ്ങളോളം ദുരിതം അനുഭവിക്കേണ്ടി വന്ന ഹർഷിനക്ക് നീതി ലഭിക്കാൻ യുഡിഎഫ് ഒപ്പമുണ്ടാകുമെന്ന് പ്രതിപക്ഷ നേതാവ് വി.ഡി.സതീശൻ ഉറപ്പു നൽകി. പ്രതിപക്ഷ നേതാവുമായി ഹർഷിന നടത്തിയ കൂടിക്കാഴ്ച്‌ചയിലാണ് അദ്ദേഹം ഉറപ്പ് നൽകിയത്. സമര സമിതി ചെയർമാൻ ദിനേശ് പെരുമണ്ണ കൺവീനർ മുസ്‌തഫ പാലാഴി, വൈസ് ചെയർമാൻ എം.ടി. സേതുമാധവൻ, എം വി അബ്ദുല്ലത്തീഫ്, കെ.കെ.കോയ, ഹമീദ് മൗലവി, അൻഷാദ് മണക്കടവ്, ഹർഷിനയുടെ ഭർത്താവ് അഷ്റഫ് എന്നിവർക്ക് ഒപ്പമാണ് ഹർഷിന കോഴിക്കോട് ഡിസിസി ഓഫീസിൽ പ്രതിപക്ഷ നേതാവിനെ കണ്ടത്. പ്രതിപക്ഷ ഉപനേതാവ് പി.കെ.കുഞ്ഞാലിക്കുട്ടി, യുഡിഎഫ് കൺവീനർ അടൂർ പ്രകാശ് എം പി എം.കെ.രാഘവൻ എംപി, ഷാഫി പറമ്പിൽ എം പി,ഡിസിസി പ്രസിഡൻ്റ് കെ.പ്രവീൺകുമാർ, മുസ്ലീം ലീഗ് ജില്ലാ പ്രസിഡൻ്റ് എം.എ.റസാഖ്,അഡ്വ കെ ജയന്ത്,കെ സി അബു എന്നിവർ കൂടിക്കാഴ്ച്‌ചയിൽ പങ്കെടുത്തു. 15 ന് ചേരുന്ന നിയമസഭാ സമ്മേളനത്തിൽ ഹർഷിനയുടെ വിഷയം ഉന്നയിക്കുമെന്നും ഹർഷിനക്കു വേണ്ടി വാദിക്കാൻ പബ്ളിക്ക് പ്രോസിക്യൂട്ടറെ അനുവദിക്കണമെന്ന് സർക്കാരിനോട് ആവശ്യപ്പെടുമെന്നും അദ്ദേഹം പറഞ്ഞു. സർക്കാർ തുടരുന്ന അനീതിയിൽ പ്രതിഷേധിച്ച് ഒക്ടോബർ 8 ന് സെക്രട്ടേറിയറ്റിനു മുൻപിൽ ഹർഷിന സമരസമിതിയുടെ നേതൃത്വത്തിൽ ഏകദിന സത്യാഗ്രഹ സമരം നടത്തുമെന്ന് ചെയർമാൻ ദിനേശ് പെരുമണ്ണയും കൺവീനർ മുസ്തഫ പാലാഴിയും പറഞ്ഞു. സമരം പ്രതിപക്ഷ നേതാവ് ഉദ്ഘാടനം ചെയ്യും.