പാലക്കാട് ∙ സ്ത്രീകളോട് മോശമായി പെരുമാറിയെന്ന ആരോപണത്തെ തുടർന്ന് കോൺഗ്രസിൽ നിന്ന് പുറത്താക്കപ്പെട്ട യുവ കോൺഗ്രസ് നേതാവ് റിയാസ് തച്ചമ്പാറ സി.പി.എമ്മിൽ ചേർന്നു. തച്ചമ്പാറ കോൺഗ്രസ് മണ്ഡലം പ്രസിഡന്റും യൂത്ത് കോൺഗ്രസ് മുൻ ജില്ല സെക്രട്ടറിയുമായ റിയാസിനെ പാർട്ടിയിൽ അംഗമാക്കി സ്വീകരിച്ചത് ജില്ലാ സെക്രട്ടറി ഇ.എൻ. സുരേഷ് ബാബു ആയിരുന്നു.
റിയാസ് സ്ത്രീകളോട് പെരുമാറിയ രീതി, കോൺഗ്രസ് നേതാവ് രാഹുൽ മാങ്കൂട്ടത്തിന്റെ പെരുമാറ്റത്തോട് താരതമ്യം ചെയ്യാനാവില്ലെന്നും റിയാസിന് പാർട്ടി സംരക്ഷണം നൽകുമെന്നും സുരേഷ് ബാബു വ്യക്തമാക്കി.ചൊവ്വാഴ്ചയാണ് കോൺഗ്രസ് റിയാസിനെ പ്രാഥമിക അംഗത്വത്തിൽ നിന്ന് പുറത്താക്കിയത്. രണ്ട് സ്ത്രീകളുടെ പരാതിയുടെ അടിസ്ഥാനത്തിൽ കല്ലടിക്കോട് പൊലീസ് കേസ് രജിസ്റ്റർ ചെയ്തിരുന്നു. നേരത്തെ നിരവധി സ്ത്രീകൾ നൽകിയ പരാതികളുടെ അടിസ്ഥാനത്തിൽ താക്കീത് ചെയ്തിരുന്നതായും ഡി.സി.സി അധ്യക്ഷൻ എ. തങ്കപ്പൻ അറിയിച്ചു.
സ്ത്രീകൾക്ക് അനുകൂലമാണെന്ന് പറയുന്ന സി.പി.എം, മറുവശത്ത് സ്ത്രീകളോട് മോശമായി പെരുമാറിയ നേതാവിനെ സ്വീകരിക്കുന്നുവെന്ന് എ. തങ്കപ്പൻ വിമർശിച്ചു.തച്ചമ്പാറ ഗ്രാമപഞ്ചായത്ത് യു.ഡി.എഫ് പിടിച്ചെടുത്തതിൽ നിർണായക പങ്ക് വഹിച്ച നേതാവാണ് റിയാസ്. അദ്ദേഹത്തിന്റെ വരവ് പഞ്ചായത്ത് തിരികെ പിടിക്കാനുള്ള സാധ്യത വർധിപ്പിക്കുമെന്ന് സി.പി.എം വിലയിരുത്തുന്നു.
