ഓണത്തിനായി കേരളത്തിലേക്ക് എത്തുന്ന മലയാളികൾക്കായി വിപുലമായ യാത്രാസൗകര്യങ്ങൾ ഒരുക്കിയതായി ഇന്ത്യൻ റെയിൽവെ അറിയിച്ചു. ജൂലൈ മുതൽ സർവീസ് ആരംഭിച്ച സ്പെഷ്യൽ ട്രെയിനുകൾ ഉൾപ്പെടെ ഇതുവരെ 92 പ്രത്യേക ട്രെയിൻ സർവീസുകളാണ് പ്രഖ്യാപിച്ചതെന്ന് ദക്ഷിണ റെയിൽവെയുടെ വക്താവ് വ്യക്തമാക്കി.
ചെന്നൈയിൽ നിന്ന് ആറ് സർവീസുകളും, മംഗളൂരുവിലേക്ക് 22 സർവീസുകളും, ബെംഗളൂരുവിലേക്ക് 18 സർവീസുകളും, വേളാങ്കണ്ണിയിലേക്ക് 10 സർവീസുകളും, പട്‌നയിലേക്ക് 36 സർവീസുകളും ഓണവുമായി ബന്ധപ്പെട്ട് നടത്തപ്പെടും.
ഇതോടൊപ്പം ഓണക്കാലത്തെ തിരക്കിനെ പ്രതിരോധിക്കാൻ പത്ത് ട്രെയിനുകളിൽ അധിക കോച്ചുകളും ചേർത്തിട്ടുണ്ട്.
തിരുവനന്തപുരം – കോഴിക്കോട് – തിരുവനന്തപുരം ജനശതാബ്ദി എക്‌സ്പ്രസ് (12076/12075) ട്രെയിനിൽ ഒരു ചെയർ കാർ,
തിരുവനന്തപുരം – എറണാകുളം – തിരുവനന്തപുരം വഞ്ചിനാട് എക്‌സ്പ്രസ് (16304/16303) ട്രെയിനിൽ ഒരു ജനറൽ സെക്കന്റ് ക്ലാസ് കോച്ച്,
തിരുവനന്തപുരം – ഗുരുവായൂർ – തിരുവനന്തപുരം ഇന്റർസിറ്റി എക്‌സ്പ്രസ് (16342/16341), തിരുവനന്തപുരം – മദുരൈ – തിരുവനന്തപുരം അമൃത എക്‌സ്പ്രസ് (16343/16344) എന്നിവയിൽ ഓരോ ജനറൽ സെക്കന്റ് ക്ലാസ് കോച്ചുകൾ വീതം,
മംഗളൂരു – തിരുവനന്തപുരം – മംഗളൂരു മാവേലി എക്‌സ്പ്രസ് (16603/16604) ട്രെയിനിൽ ഒരു സ്ലീപ്പർ കോച്ച് കൂടി ഉൾപ്പെടുത്തിയിട്ടുണ്ട്.
ഓണക്കാലത്ത് പരമാവധി യാത്രക്കാരെ സൗകര്യപ്രദമായി എത്തിക്കാനാണ് ഈ നടപടികൾ സ്വീകരിച്ചിരിക്കുന്നതെന്നും വ്യത്യസ്തമായ പ്രചാരണങ്ങൾ അടിസ്ഥാനരഹിതമാണെന്നും റെയിൽവെ വ്യക്തമാക്കി.
