ഫറോക്ക് : പുതിയ തലമുറയെ കേരള ടൂറിസത്തിന്റെ ബ്രാൻഡ് അംബാസഡർമാരാക്കുമെന്നും, ടൂറിസം മേഖലയുടെ വളർച്ചയിൽ യുവജനങ്ങൾ സജീവ പങ്കാളികളാകണമെന്നും വിനോദസഞ്ചാര മന്ത്രി പി.എ. മുഹമ്മദ് റിയാസ് പറഞ്ഞു. വിനോദസഞ്ചാര വകുപ്പ്–ഡിടിപിസി സംയുക്തമായി ഫറോക്കിൽ സംഘടിപ്പിച്ച ജില്ലാതല ടൂറിസം ഡെസ്റ്റിനേഷൻ ക്യാംപ് ഉദ്ഘാടനം ചെയ്യുകയായിരുന്നു മന്ത്രി.ടൂറിസം ക്ലബ് ജില്ലയിൽ നടത്തുന്ന പ്രവർത്തനങ്ങൾ അടങ്ങിയ ‘മിഷൻ 2025’ കലണ്ടർ പ്രകാശനവും മന്ത്രി നിർവഹിച്ചു. ടൂറിസം ജോയിന്റ് ഡയറക്ടർ ടി.ഗിരീഷ് കുമാർ, ഡപ്യൂട്ടി ഡയറക്ടർ പ്രദീപ് ചന്ദ്രൻ, ഡിടിപിസി സെക്രട്ടറി ഡോ. ടി.നിഖിൽ ദാസ്, ടൂറിസം ക്ലബ് സംസ്ഥാന കോഓർഡിനേറ്റർ പി.സച്ചിൻ, ജില്ലാ കോഓർഡിനേറ്റർ പി.സോനു രാജ് എന്നിവർ പ്രസംഗിച്ചു. വിവിധ കോളജുകളിൽ പ്രവർത്തിക്കുന്ന ടൂറിസം ക്ലബ്ബിലെ വിദ്യാർഥികൾ പങ്കെടുക്കുന്ന ക്യാംപിന്റെ ഭാഗമായി ജില്ലയിലെ പ്രധാന വിനോദ സഞ്ചാര കേന്ദ്രങ്ങളിൽ സന്ദർശനം നടത്തും. ടൂറിസം വികസനത്തിൽ വിദ്യാർഥികളുടെ സജീവ പങ്കാളിത്തം ഉറപ്പാക്കുക, വിനോദസഞ്ചാര മേഖലയിൽ വിദ്യാർഥികളുടെ അറിവ് വർധിപ്പിക്കുക, ടൂറിസം മേഖലയുടെ സാധ്യതകളിലൂടെ തൊഴിൽ–സംരംഭകത്വ അവസരങ്ങൾ സൃഷ്ടിക്കുക എന്നിവ ലക്ഷ്യമിട്ടാണ് ടൂറിസം ഡെസ്റ്റിനേഷൻ ക്യാംപ് നടത്തുന്നത്.
