കുടുംബ വരുമാനം, വീടിന്റെ വലുപ്പം, വീട്ടിലെ നാലു ചക്ര വാഹനം എന്നിവ നോക്കി ഭിന്നശേഷിക്കാര്‍ക്ക് പെന്ഷന് നിഷേധിക്കുന്ന സാഹചര്യം ഒഴിവാക്കണമെന്ന് ഭിന്നശേഷി കുട്ടികളുടെ രക്ഷിതാക്കളുടെ സംഘടയായ കോഴിക്കോട് ജില്ലാ പരിവാറിന്റെ ജില്ലാ സമ്മേളനം ആവശ്യപ്പെട്ടു. പെന്ഷന് അര്‍ഹത വിലയിരുത്തുമ്പോള്‍ ഭിന്നശേഷിക്കാരുടെ സ്വന്തം വരുമാനം മാത്രമേ പരിഗണിക്കാവൂ എന്നും ഭിന്ന ശേഷിക്കാര്‍ക്ക് ആരോഗ്യ ഇന്‍ഷൂറന്‍സ് ഏര്‍പ്പെടുത്തണമെന്നും സമ്മേളനം ആവശ്യപ്പെട്ടു.
മുതലക്കുളം സരോജ് ഭവനില്‍ വനം-പരിസ്ഥിതി മന്ത്രി എ.കെ.ശശീന്ദ്രന്‍ സമ്മേളനം ഓണ്‍ലൈനായി ഉദ്ഘാടനം നിര്‍വഹിച്ചു. കോര്‍പറേഷന്‍ ആരോഗ്യ സ്റ്റാന്റിംഗ് കമ്മിറ്റി ചെയര്‍പേഴ്‌സണ്‍ ഡോക്ടര്‍ എസ്.ജയശ്രി മുഖ്യാതിഥിയായി. പരിവാര്‍ ജില്ലാ പ്രസിഡന്റ് ഡോക്ടര്‍ ഡി കെ ബാബു അധ്യക്ഷത വഹിച്ചു. ജനറല്‍ സെക്രട്ടറി കെ പി അനിരുദ്ധന്‍ റിപ്പോര്‍ട്ടും ട്രഷറര്‍ കെ പി അന്‍വര്‍ സാദിക്ക് വരവ് ചിലവ് കണക്കും അവതരിപ്പിച്ചു.
ഉന്നത വിജയം നേടിയ ഭിന്നശേഷി വിദ്യാര്‍ഥികളെയും ജോലിയിലെ ആദ്യ ശമ്പളം വയനാട് ദുരിതാശ്വാസ നിധിയിലേക്ക് സംഭാവന ചെയ്ത മുഹമ്മദ് ഷാഹിന്‍ കൊയിലാണ്ടി, ഭിന്നശേഷി സ്പെഷല്‍ ഒളിമ്പിക്‌സില്‍ സ്വര്‍ണ മെഡല്‍ നേടിയ ദില്‍ന ശശികുമാര്‍ നരിക്കുനി എന്നിവരെയും ചടങ്ങില്‍ അനുമോദിച്ചു. അബ്ദുള്‍ അസീസ്, സൈനുദീന്‍ മടവൂര്‍, പ്രൊഫസര്‍ കെ കോയോട്ടി, എം.പി.കരുണാകരന്‍, സുലൈഖ അബൂട്ടി, രവീന്ദ്രന്‍ പാറോല്‍, പ്രദീപ് കുമാര്‍, ഷീന മാവൂര്‍ എന്നിവര്‍ സംസാരിച്ചു. കെ പി അനിരുദ്ധന്‍ സ്വാഗതവും പി മുകുന്ദന്‍ നന്ദിയും പറഞ്ഞു. പുതിയ ഭാരവാഹികളായി ഡോ: ഡി.കെ.ബാബു പ്രിസിഡന്റ് കെ.പി.അനിരുദ്ധന്‍ ജനറല്‍ സെക്രട്ടറി, കെ.പി.അന്‍വര്‍ സാദിക്ക് ട്രഷറര്‍, ഷീന മാവൂര്‍ വര്‍ക്കിങ് പ്രസിഡന്റ് എന്നിവരെ തെരഞ്ഞെടുത്തു.
