ഈ വര്ഷത്തെ എംബിബിഎസ് പ്രവേശനത്തിനുള്ള അഖിലേന്ത്യ ക്വാട്ടയിലേക്കുള്ള കൗണ്സിലിങ് രജിസ്ട്രേഷൻ ആരംഭിച്ചു. ഇന്ന് (ജൂലൈ 21) മുതല് വിദ്യാര്ഥികള്ക്ക് കൗണ്സിലിങ് രജിസ്ട്രേഷനായി അപേക്ഷിക്കാം. രാജ്യത്താകെ 775 മെഡിക്കല് കോളജുകളിലേക്കുള്ള അഖിലേന്ത്യ ക്വാട്ടയിലേക്കുള്ള രജിസ്ട്രേഷനാണ് ആരംഭിച്ചത്. ഈ വർഷം എംബിബിഎസ് പ്രവേശനത്തിനുള്ള കേന്ദ്ര കൗണ്സിലിങിൽ പങ്കെടുക്കുന്ന മെഡിക്കൽ കോളജുകളുടെ വിവരങ്ങൾ മെഡിക്കൽ കൗണ്സിലിംങ് കമ്മിറ്റി (എംസിസി) പുറത്തുവിട്ടിരുന്നു. രാജ്യത്തെ എയിംസ് സ്ഥാപനങ്ങളിലെ 2,182 സീറ്റുകൾ ഉൾപ്പെടെ ആകെ 1,15,900 സീറ്റുകൾക്കാണ് അവസരം.
15 ശതമാനം അഖിലേന്ത്യാ ക്വാട്ടയ്ക്ക് കീഴിലുള്ള എംബിബിഎസ്/ബിഡിഎസ് കൗൺസിലിങ് ഓണ്ലൈൻ രജിസ്ട്രേഷനാണ് ഇന്ന് ആരംഭിച്ചത്. ചോയ്സ് -ഫില്ലിംങ് ജൂലൈ 22- നും ആരംഭിക്കും.എംസിസി ഇതുവരെ കൗണ്സിലിങ് വിശദാംശങ്ങൾ പൂർണമായും പുറത്തുവിട്ടിട്ടില്ല എന്ന് വിദ്യാഭ്യാസ വിദഗ്ധൻ ദേവ് ശർമ്മ അറിയിച്ചു. നിലവിൽ പങ്കെടുക്കുന്ന മെഡിക്കൽ കോളജുകളുടെ പട്ടികയാണ് പുറത്തിറക്കിയിരിക്കുന്നത്. സ്ഥാപനങ്ങളുടെ എണ്ണം, സീറ്റ് ലഭ്യത, സർക്കാർ കോളജോ, സ്വകാര്യ കോളജോ എന്നതിനെക്കുറിച്ചുള്ള വിശദാംശങ്ങളുമാണ് ഈ പട്ടികയിൽ ഉൾപ്പെടുന്നതെന്നും അദ്ദേഹം പറഞ്ഞു. ഈ പ്രാവശ്യം 12.3 ലക്ഷം പേരാണ് എംബിബിഎസ് പ്രവേശനത്തിനുള്ള യോഗ്യത നേടിയത്.
