കോഴിക്കോട് : ഡോ. കെ. സുകുമാരപിള്ള രചിച്ച് കേരള ഭാഷാ ഇൻസ്റ്റിറ്റ്യൂട്ട് പ്രസിദ്ധീകരിച്ച ‘കൈരളീ ശബ്ദാനുശാസനം’ എന്ന പുസ്തകത്തിന്റെ പ്രകാശനവും സെമിനാർ ഉദ്ഘാടനവും തിങ്കളാഴ്ച (ജൂലൈ 14ന്) രാവിലെ 10 മണിക്ക് കോഴിക്കോട് ഗവ. ആർട്സ് & സയൻസ് കോളെജിൽ നടക്കും. തുഞ്ചത്തെഴുത്തച്ഛൻ മലയാളം സർവ്വകലാശാല മുൻ വൈസ് ചാൻസലർ പ്രൊഫ. അനിൽ വള്ളത്തോൾ ഉദ്ഘാടനം നിർവഹിക്കും. കോളേജ് പ്രിൻസിപ്പാൾ ഡോ. പ്രിയ പീലിക്കോട് പുസ്തകം ഏറ്റുവാങ്ങും. ഡയറക്ടർ ഡോ. എം. സത്യൻ അധ്യക്ഷനാകും. കേരള ഭാഷാ ഇൻസ്റ്റിറ്റ്യൂട്ട് റിസർച്ച് ഓഫീസർ കെ. ആർ. സരിതകുമാരി പുസ്തകം പരിചയപ്പെടുത്തും.
വടക്കു കിഴക്കൻ മേഖലാ വികസനമന്ത്രാലയം മുൻ ഉപദേഷ്ടാവ് എസ്. സുരേഷ്കുമാർ, ഒറ്റപ്പാലം എൻ.എസ്.എസ് കോളെജ് മുൻ പ്രൊഫസർ എ. എൻ. കൃഷ്ണൻ, ഗവ. ആർട്സ് കോളെജ് മലയാളഗവേഷണ വിഭാഗം മേധാവി ഡോ. കെ. പി. രവി, കേരള ഭാഷാ ഇൻസ്റ്റിറ്റ്യൂട്ട്
റിസർച്ച് ഓഫീസർ അമ്പിളി ടി. കെ. എന്നിവർ സംസാരിക്കും. 525 രൂപയുള്ള പുസ്തകം ഇൻസ്റ്റിറ്റ്യൂട്ട് വില്പനശാലകളിൽ ലഭിക്കും.
തുടർന്ന് നടക്കുന്ന സെമിനാറിൽ നിബന്ധനകളിൽ നിന്ന് ബന്ധങ്ങളിലേക്ക്; മലയാളവ്യാകരണം പുതുബോധങ്ങളുടെ വെളിച്ചത്തിൽ എന്ന വിഷയത്തിൽ ചിറ്റൂർ ഗവ. കോളെജ് മലയാളവിഭാഗത്തിലെ ഡോ. ടി. ശ്രീവത്സൻ പ്രബന്ധം അവതരിപ്പിക്കും. ഡോ. പി. അബ്ദുൽ ഗഫൂർ മോഡറേറ്ററാകും.
ഉച്ചക്ക് 1. 30ന് വ്യാകരണപഠനം എന്ന സംവാദ വിഷയം എന്ന സെഷനിൽ ബാലുശ്ശേരി സർക്കാർ കോളേജ് മുൻ പ്രിൻസിപ്പാൾ ഡോ. സി. ജെ. ജോർജ് പ്രബന്ധം അവതരിപ്പിക്കും. ഡോ. സിജു കെ. ഡി. മോഡറേറ്ററാകും.
2.30 മുതൽ നടക്കുന്ന ഡോ. കെ. സുകുമാരപിള്ളയുടെ വ്യാകരണസമീപനം എന്ന സെഷനിൽ തലശ്ശേരി ഗവ. ബ്രണ്ണൻ കോളെജിലെ മലയാള വിഭാഗത്തിലെ പ്രൊഫ. രാജേന്ദ്രൻ എടത്തുംകര വിഷയാവതരണം നടത്തി സംസാരിക്കും. ഡോ. എസ് സുസ്മിത മോഡറേറ്ററാകും.
