ചാലിയാർ പുഴയിൽ തോണി മറിഞ്ഞ് കാണാതായ കൊളത്തറ കണ്ണാടിക്കുളം സ്വദേശി കിളിയനാട് അബ്ദുൽ സലാമിൻ്റെ (58) മൃതദേഹം കണ്ടെത്തി. ഫറോക്ക് പാലത്തിന് സമീപം മത്സ്യത്തൊഴിലാളികളുടെയും നാട്ടുകാരുടെയും ഫയർഫോഴ്സിൻ്റെയും നേതൃത്വത്തിൽ നടത്തിയ തിരച്ചിലിനൊടുവിലാണ് സ്റ്റാൻഡേർഡ് ഓട്ട് കമ്പനിയോട് ചേർന്നുള്ള ഭാഗത്ത് നിന്ന് ഇന്ന് രാവിലെ മൃതദേഹം ലഭിച്ചത്.
കഴിഞ്ഞ ഞായറാഴ്ച സന്ധ്യയോടെയാണ് അബ്ദുൽ സലാം ഉൾപ്പെട്ട തോണി അപകടത്തിൽപ്പെട്ടത്. കൊളത്തറ ജെല്ലിഫിഷ് കടവിനോട് ചേർന്ന് ചാലിയാറിൻ്റെ നടുക്ക് വച്ച് മീൻ പിടിക്കുന്നതിനിടെയായിരുന്നു സംഭവം. സഹോദരനായ കിളിയനാട് മുഹമ്മദിനൊപ്പമാണ് സലാം മീൻ പിടിക്കാൻ പോയത്.
വല വീശുന്നതിനിടെ അപ്രതീക്ഷിതമായി തോണി മറിയുകയായിരുന്നു. അപകടത്തിൽപ്പെട്ട ഉടൻ ഇരുവരും കരയിലേക്ക് നീന്തി രക്ഷപ്പെടാൻ ശ്രമിച്ചു. എന്നാൽ, മുഹമ്മദ് കരയിലെത്തിയ ശേഷം തിരിഞ്ഞുനോക്കുമ്പോഴാണ് സലാമിനെ കാണാതായ വിവരം അറിയുന്നത്.
