വിദ്യാര്ത്ഥി കേന്ദ്രീകൃത കാഴ്ചപ്പാടില് നിന്നുകൊണ്ട് സമഗ്ര കരിക്കുലം പരിഷ്കരണം നടത്താനായതായി ഉന്നത വിദ്യാഭ്യാസ വകുപ്പ് മന്ത്രി ഡോ. ആര് ബിന്ദു. നാലു വര്ഷ ബിരുദ പ്രോഗ്രാം (എഫ്.വൈ.യു.ജി.പി.) 2025-26 ബാച്ച് ആരംഭിക്കുന്ന വിജ്ഞാനോത്സവത്തിന്റെ സംസ്ഥാനതല ഉദ്ഘാടനം കോഴിക്കോട് ആര്ട്സ് ആന്ഡ് സയന്സ് കോളേജില് നിര്വഹിക്കുകയായിരുന്നു മന്ത്രി. അധ്യാപകരുടെ അറിവ് മാത്രം ഏറ്റുവാങ്ങുന്ന ഒരു തലമുറ എന്നതില് നിന്ന് വിദ്യാര്ത്ഥികളുടെ കഴിവുകള്ക്ക് കൂടുതല് പ്രാധാന്യം നല്കുന്ന തരത്തിലേക്ക് പുതിയ കരിക്കുലം മാറ്റാനായതായി മന്ത്രി പറഞ്ഞു.
അക്കാദമിക കാര്യങ്ങളില് മാത്രം ഒതുങ്ങി നില്ക്കാതെ തികഞ്ഞ സാമൂഹിക ബോധമുള്ള വ്യക്തികളായി വിദ്യാര്ത്ഥികളെ വാര്ത്തെടുക്കാന് തക്ക കോഴ്സുകളാണ് നാലുവര്ഷ ബിരുദ പ്രോഗ്രാമില് ഫൗണ്ടേഷന് കോഴ്സായി ഉള്പ്പെടുത്തിയിട്ടുള്ളത്. സംസ്ഥാനത്തെ സര്വകലാശാലകളില് 200 കോടി രൂപ ചെലവിലാണ് ട്രാന്സ്ലേഷണല് റിസര്ച്ച് ലാബുകള് സ്ഥാപിച്ചുവരുന്നത്. സൈദ്ധ്യാന്തിക അറിവുകളെ പ്രായോഗിക തലത്തിലേക്ക് മാറ്റാനുള്ള സംവിധാനമാണ് ഈ ലാബുകളിലൂടെ ഒരുങ്ങുന്നത്. കലാലയങ്ങളുടെ അടിസ്ഥാന സൗകര്യ മേഖലയില് വലിയ മാറ്റം കൊണ്ടുവരാന് സര്ക്കാരിനായി. കിഫ്ബിയിലൂടെ 1500 കോടി രൂപയും റൂസ്സ പദ്ധതിയിലൂടെ 532 കോടി രൂപയും ഉപയോഗപ്പെടുത്തിയും സംസ്ഥാന സര്ക്കാരിന്റെ പ്ലാന് ഫണ്ട് ഉപയോഗിച്ചും അനേകം നിര്മ്മാണ പ്രവര്ത്തനങ്ങളും പൂര്ത്തിയാക്കിയതായും മന്ത്രി പറഞ്ഞു.
പരിപാടിയില് അഹമ്മദ് ദേവര്കോവില് എംഎല്എ അധ്യക്ഷത വഹിച്ചു. വാര്ഡ് കൗണ്സിലര് രമ്യ സന്തോഷ്, കോളേജ് വിദ്യാഭ്യാസ വകുപ്പ് ഡയറക്ടര് കെ സുധീര്, അഡീഷണല് ഡയറക്ടര് സുനില് ജോണ്, കാലിക്കറ്റ് സര്വകലാശാല സിന്ഡിക്കേറ്റ് അംഗം പി കെ ഖലീമുദ്ദീന്, കോളേജ് പ്രിന്സിപ്പാള് ഡോ. പി പ്രിയ, കൗണ്സില് സെക്രട്ടറി സജിത കിഴിനിപ്പുറത്ത്, കോളേജ് യൂണിയന് പ്രതിനിധി പി അമന്, പിടിഎ വൈസ് പ്രസിഡന്റ് കെ പി അജയന് തുടങ്ങിയവര് സംസാരിച്ചു.
