കോഴിക്കോട്: പേവിഷബാധക്കെതിരായ ബോധവത്കരണ പ്രവർത്തനങ്ങളുടെ ഭാഗമായി, ജൂൺ 30ന് ജില്ലയിലെ എല്ലാ സ്കൂൾ അസംബ്ലികളിലും പ്രത്യേക ക്ലാസുകൾ സംഘടിപ്പിക്കുമെന്ന് ആരോഗ്യവകുപ്പ് അറിയിച്ചു.
മൃഗങ്ങളുടെ കടിയോ മാന്തലോ പോറലോ ഉണ്ടായാൽ സ്വീകരിക്കേണ്ട പ്രഥമശുശ്രൂഷ, പ്രതിരോധ വാക്സിനേഷന്റെ പ്രാധാന്യം, മൃഗങ്ങളുമായി ഇടപഴകുമ്പോൾ പാലിക്കേണ്ട മുൻകരുതലുകൾ എന്നിവയെക്കുറിച്ചായിരിക്കും അധ്യാപകരെയും കുട്ടികളെയും ബോധവത്കരിക്കുന്നത്.
ആരോഗ്യ വകുപ്പും വിദ്യാഭ്യാസ വകുപ്പും ചേർന്ന് നടത്തുന്ന ഈ സംയുക്ത ബോധവത്കരണ പരിപാടിയുടെ ഭാഗമായാണ് സ്കൂൾ ക്ലാസുകൾ. തുടർന്നായി ജൂലൈ മാസത്തിൽ എല്ലാ സ്‌കൂളുകളിലും പിടിഎ യോഗങ്ങളുടെ ഭാഗമായി അധ്യാപകർക്കും രക്ഷിതാക്കൾക്കുമായി പ്രത്യേക ബോധവത്കരണ ക്ലാസുകളും നടത്തും.
മാർഗനിർദ്ദേശങ്ങൾ ഉൾപ്പെടുന്ന ലഘുലേഖകൾ, വീഡിയോകൾ, പോസ്റ്ററുകൾ തുടങ്ങിയവ തയ്യാറാക്കി വിദ്യാലയങ്ങൾ വഴി പ്രചാരണം നടത്തും.
ജില്ലാതല ബോധവത്കരണ പരിപാടിയുടെ ഔപചാരിക ഉദ്ഘാടനം പ്രൊവിഡൻസ് ഗേൾസ് ഹയർ സെക്കൻഡറി സ്‌കൂളിൽ ജില്ലാ കലക്ടർ സ്നേഹിൽ കുമാർ സിങ് നിർവഹിക്കും. ജില്ലാ മെഡിക്കൽ ഓഫീസർ ചടങ്ങിൽ അധ്യക്ഷനാകും.
ജില്ലയിലെ മറ്റ് സ്‌കൂളുകളിൽ, സമീപത്തെ ആരോഗ്യ കേന്ദ്രങ്ങളിലെയോ ആശുപത്രികളിലെയോ നഗര ആരോഗ്യ കേന്ദ്രങ്ങളിലെയോ നിന്നുള്ള ഡോക്ടർമാരും ആരോഗ്യ പ്രവർത്തകരും ക്ലാസുകൾക്ക് നേതൃത്വം നൽകും
