സംസ്ഥാന വനിതാ ശിശു വികസന വകുപ്പ് അശരണരായ വിധവകൾക്ക് വേണ്ടി നടപ്പിലാക്കുന്ന ‘അഭയകിരണം’ പദ്ധതിയിലേക്ക് അപേക്ഷ ക്ഷണിച്ചു. സമൂഹത്തിൽ യാതൊരു വരുമാനമോ സുരക്ഷിതത്വമോ ഇല്ലാത്ത വിധവകൾക്ക് സംരക്ഷണം നൽകുന്നവര്‍ക്ക് പ്രതിമാസം 1000 രൂപ ധനസഹായം നൽകുന്നതാണ് പദ്ധതി. നിരാലംബരായ സ്ത്രീകൾക്ക് കുടുംബത്തിന്റെ തണലിൽ തന്നെ സുരക്ഷിതമായി ജീവിക്കാനുള്ള സാഹചര്യം ഒരുക്കുകയാണ് ഇതിലൂടെ സർക്കാർ ലക്ഷ്യമിടുന്നത്.
ഓണ്‍ലൈനായാണ് അപേക്ഷിക്കേണ്ടത്. അക്ഷയ കേന്ദ്രങ്ങൾ വഴിയോ മറ്റ് ജനസേവാ കേന്ദ്രങ്ങൾ വഴിയോ നേരിട്ടോ www.schemes.wcd.kerala.gov.in എന്ന വെബ്സൈറ്റിലൂടെ അപേക്ഷിക്കാം. അപേക്ഷ സമർപ്പിക്കാനുള്ള അവസാന തീയതി 2025 ഡിസംബർ 15. പദ്ധതിയെക്കുറിച്ചുള്ള കൂടുതൽ വിവരങ്ങൾക്കും സംശയങ്ങൾക്കും അടുത്തുള്ള ഐ.സി.ഡി.എസ്. ഓഫീസുമായിട്ടോ അങ്കണവാടികളുമായോ ബന്ധപ്പെടാവുന്നതാണെന്ന് ജില്ലാ വനിതാ ശിശു വികസന ഓഫീസർ അറിയിച്ചു.
