സ്കൂൾ-കോളേജ് സമയങ്ങളിൽ ഗതാഗത തടസ്സം ഒഴിവാക്കുകയും വിദ്യാർത്ഥികളുടെ സുരക്ഷ ഉറപ്പാക്കുകയും ചെയ്യുന്നതിനായി ടിപ്പർ ലോറികൾക്കുള്ള ഗതാഗത നിയന്ത്രണത്തിന് സംസ്ഥാന സർക്കാർ നേരത്തെ ഉത്തരവിട്ടിരുന്നു. സർക്കാർ ഉത്തരവ് നമ്പർ 13/2014/ഗതാഗതം പ്രകാരമാണ് എല്ലാ ജില്ലകളിലും രാവിലെ 9 മുതൽ 10 വരെയും വൈകുന്നേരം 4 മുതൽ 5 വരെയും ടിപ്പർ വാഹനങ്ങളുടെ ഗതാഗതം നിയന്ത്രിച്ചത്.
എങ്കിലും ഓരോ ജില്ലയിലെയും പ്രത്യേക ഗതാഗത സാഹചര്യം വിലയിരുത്തി ഇത്തരത്തിലുള്ള വാഹനങ്ങളുടെ സമയക്രമം മാറ്റാനും നിയന്ത്രിക്കാനും അധികാരം 5-6-2018 ലെ സർക്കാർ ഉത്തരവ് 256/2018/ഗതാഗതം പ്രകാരം ജില്ലാ കളക്ടർമാർക്ക് നൽകപ്പെട്ടിട്ടുണ്ട്.
ഈ ഉത്തരവിനെ അടിസ്ഥാനമാക്കി വിവിധ ജില്ലകളിൽ ടിപ്പർ ലോറികളും ടിപ്പിംഗ് മെക്കാനിസം ഉള്ള മറ്റ് വാഹനങ്ങളും നിശ്ചിത സമയങ്ങളിലേക്ക് നിയന്ത്രിക്കപ്പെട്ടിട്ടുണ്ട്. ചില സ്ഥലങ്ങളിൽ ദേശീയപാതയിൽ നടക്കുന്ന വികസനപ്രവർത്തനങ്ങൾക്കായി പ്രത്യേക ഇളവുകളും ജില്ലാ കളക്ടർമാർ നൽകിയിട്ടുണ്ട്.
