കൊയിലാണ്ടി നടുവത്തൂരിലെ ശ്രീ വാസുദേവാ ശ്രമം ഹയർ സെക്കൻഡറി സ്കൂളിലെ മുൻ സംഗീതാധ്യാപകനും പാലക്കാട് സ്വദേശിയുമായ ശ്രീ പ്രേം രാജിന് അദ്ദേഹത്തിന്റെ അർഹമായ അമ്പത് വർഷത്തെ സംഗീതസപര്യയ്ക്ക് ലഭിച്ച ആദരം, ലോക സംഗീത ദിനത്തിൽ കൊയിലാണ്ടിയുടെ ഹൃദയത്തിൽ എന്നും നിറഞ്ഞുനില്ക്കുന്ന അനുഭവമായി മാറി.
ശ്രീ പ്രേം രാജിന്റെ നേതൃത്വത്തിലുള്ള മലരി സംഗീത വിദ്യാലയത്തിലെ വിദ്യാർത്ഥികൾ അവതരിപ്പിച്ച സ്വാഗതഗാനവും മ്യൂസിക് ഫ്യൂഷനും തുടർന്ന്, പ്രശസ്ത ഗായകൻ ജി. വേണുഗോപാലും മകൻ അരവിന്ദ് വേണുഗോപാലും ചേർന്ന് അവതരിപ്പിച്ച ഗാനമേളയും സംഗമത്തിന് സംഗീത പൂർണത നൽകി. പരിപാടി സംഗീതത്തിന്റെ സമൃദ്ധിമാർന്ന ഒരു മുഹൂർത്തമായി മാറിയതായിരുന്നു.
ശ്രദ്ധ സോഷ്യൽ പാഠശാലയുടെ സംഗീത വിഭാഗമായ മ്യൂസിക്യൂവിന്റെ നേതൃത്വത്തിലാണ് ചടങ്ങ് സംഘടിപ്പിച്ചത്. പരിപാടിയുടെ ഉദ്ഘാടനം ശ്രീ പ്രേം രാജിന്റെ ശിഷ്യനായ അഡ്വ. കെ. പ്രവീൺ കുമാർ നിർവഹിച്ചു. കരുണൻ കൊടക്കാട് അധ്യക്ഷനായിരുന്നു.
കാവുംവട്ടം വാസുദേവൻ, കെ. ശാന്ത, ശിവദാസ് ചേമഞ്ചേരി എന്നിവർ ആശംസകളർപ്പിച്ചു. ശക്തി കുറുവങ്ങാട്, ക്യു ബ്രഷ് കൊയിലാണ്ടി, ദേവഗീതം സംഗീത സഭ വടകര, കൊരയങ്ങാട് കലാക്ഷേത്രം, നാട്ടുഗാലറി കൊയിലാണ്ടി, പൂക്കാട് കലാലയം, സവേരി കലാനിലയം, പെൻഷനേഴ്സ് യൂനിയനുകൾ എന്നിവർ ഉപഹാരങ്ങൾ നൽകി.
എൻ. കെ. മുരളി സ്വാഗതവും ചന്ദ്രൻ കാർത്തിക നന്ദിയും പറഞ്ഞു.
