കെഎസ്ആർടിസിയുമായി ഫോൺ വഴി ബന്ധപ്പെടാൻ ശ്രമിച്ച യാത്രക്കാരുടെ നിരാശകൾക്ക് ഇനി മാറ്റം വരും. യാത്രക്കാരെ സാരമായി ബാധിച്ചിരിക്കുന്ന വിവര ലഭ്യതക്കുള്ള തടസങ്ങൾ ഒഴിവാക്കാനാണ് കെഎസ്ആർടിസിയുടെ പുതിയ നീക്കം.
ജൂലൈ 1 മുതൽ സംസ്ഥാനത്തെ എല്ലാ കെഎസ്ആർടിസി ഡിപ്പോകളിലും ലാൻഡ്‌ഫോൺ സേവനങ്ങൾ നിർത്തലാക്കി, അതിനുപകരം സമർപ്പിത മൊബൈൽ നമ്പറുകൾ പ്രയോഗത്തിലാക്കുമെന്ന് അധികൃതർ അറിയിച്ചു. കെഎസ്ആർടിസി ചെയർമാനും മാനേജിംഗ് ഡയറക്ടറുമായ പി.എസ്. പ്രമോജ് ശങ്കറിന്റെ നിർദ്ദേശപ്രകാരമാണ് വ്യാഴാഴ്ച ഇക്കാര്യം സംബന്ധിച്ച ഔദ്യോഗിക ഉത്തരവ് പുറത്തിറങ്ങിയത്. ഈ മാറ്റം വിവരസമ്പ്രേഷണത്തിൽ കാര്യക്ഷമതയും യാത്രക്കാർക്ക് മെച്ചപ്പെട്ട സേവനാനുഭവവും ഉറപ്പാക്കുമെന്നും പ്രതീക്ഷിക്കുന്നു.
പൊതുജനങ്ങൾക്ക് സൗകര്യമൊരുക്കുന്നതിനും ജീവനക്കാർക്ക് വിവിധ ആവശ്യങ്ങൾക്കായി അവരെ ബന്ധപ്പെടുന്നതിനുമായി കെഎസ്ആർടിസി ഡിപ്പോകളിലുടനീളമുള്ള എല്ലാ സ്റ്റേഷൻ മാസ്റ്റർ (എസ്എം) ഓഫീസുകളിലും ഔദ്യോഗിക സിം ഉൾപ്പെടെയുള്ള ഒരു മൊബൈൽ ഫോൺ നൽകുമെന്ന്,” ഉത്തരവിൽ പറയുന്നു.
സംസ്ഥാനത്തുടനീളമുള്ള 93 യൂണിറ്റുകളുടെയും മേധാവികൾക്ക് ഈ നിർദ്ദേശം നൽകിയിട്ടുണ്ട്. “ഈ മൊബൈൽ ഫോണുകൾ ഔദ്യോഗിക ആവശ്യങ്ങൾക്ക് മാത്രമേ ഉപയോഗിക്കാവൂ. മൊബൈൽ നമ്പറുകൾ ജനങ്ങൾക്കിടയിൽ വ്യാപകമായി പ്രചരിപ്പിക്കണം. 2025 ജൂലൈ ഒന്ന് മുതൽ ലാൻഡ് ഫോണുകളുടെ ഉപയോഗം കർശനമായി നിർത്തണം. പകരം അനുവദിച്ച മൊബൈൽ ഫോണുകൾ മാത്രമേ ഉപയോഗിക്കാവൂ,” ഉത്തരവിൽ പറയുന്നു.
