കോഴിക്കോട്: ജൂൺ 19- അന്താരാഷ്ട്ര വായനാ ദിനത്തോടനുബന്ധിച്ച് തദ്ദേശസ്വയംഭരണ വകുപ്പ്, പട്ടികവർഗ്ഗ വികസന വകുപ്പ്, സാമൂഹ്യ സാംസ്‌കാരിക സംഘടനകൾ എന്നിവയുടെ സഹകരണത്തോടെ ‘അക്ഷരോന്നതി – വായനയിലൂടെ ഉന്നതിയിലേക്ക്’ എന്ന പദ്ധതിയുടെ ഭാഗമായി RGSA IEC പ്രവർത്തനങ്ങൾ ആരംഭിച്ചു.
പട്ടികവർഗ്ഗ ഉന്നതികളിലെ സാമൂഹ്യ പഠനമുറികളിലേക്ക് പുസ്തകങ്ങൾ ശേഖരിച്ച് വിതരണം ചെയ്യുന്നത് ഈ പരിപാടിയുടെ പ്രധാന ഉദ്ദേശ്യമാണ്. പുതിയതും പഴയതുമായ പുസ്തകങ്ങൾ പൊതുജനങ്ങളിൽ നിന്നും ശേഖരിച്ച്, പതിമൂന്നോളം ഗ്രാമപഞ്ചായത്തുകളിലുള്ള 11 സാമൂഹ്യ പഠനമുറികളിലേക്കാണ് വിതരണം ചെയ്യുക.
വായനാശീല വളർത്താനും വിജ്ഞാനവിഭവങ്ങളിലേക്കുള്ള ആക്‌സസ് മെച്ചപ്പെടുത്താനും ഉദ്ദേശിച്ചാണ് ഈ പദ്ധതി. ഏകദേശം 5500 പുസ്തകങ്ങളുടെ ശേഖരം ലക്ഷ്യമിട്ടാണ് ഈ പ്രവർത്തനം ആരംഭിച്ചിരിക്കുന്നത്. ഓരോരുത്തരും കുറഞ്ഞത് ഒരു പുസ്തകമെങ്കിലും സംഭാവന ചെയ്യണമെന്ന് ഭരണകൂടം അഭ്യർത്ഥിച്ചു.
വായനയുടെ ശക്തിയെ സമൂഹമാകെ ഏറ്റെടുക്കുന്ന ഈ സംരംഭം വിദ്യാർത്ഥികളിലും യുവജനങ്ങളിലും എഴുത്തും പഠനവും സംബന്ധിച്ചുള്ള താത്പര്യം വളർത്തുമെന്നും അധികൃതർ പ്രതീക്ഷിക്കുന്നു.
