വടക്കൻ കേരളത്തിൽ 14, 15, 16 തീയതികളിൽ കേന്ദ്ര കാലാവസ്ഥ നിരീക്ഷണ കേന്ദ്രം റെഡ് അലർട്ട് മുന്നറിയിപ്പ് നൽകി. ഈ ദിവസങ്ങളിൽ അതിതീവ്ര മഴ പെയ്യുമെന്നും അതീവ ജാഗ്രത വേണമെന്നും കാലാവസ്ഥ നിരീക്ഷണ കേന്ദ്രം മേധാവി നീത കെ ഗോപാൽ അറിയിച്ചു.
14ന് കണ്ണൂർ, കാസർകോട് ജില്ലകളിലാണ് റെഡ് അലർട്ട് മുന്നറിയിപ്പ്. 15ന് കണ്ണൂർ, കാസർകോട്, കോഴിക്കോട്, വയനാട്, മലപ്പുറം ജില്ലകളിലും 16ന് കോഴിക്കോട്, വയനാട്, മലപ്പുറം ജില്ലകളിലുമാണ് റെഡ് അലർട്ട്. കാലവർഷം ശക്തിയാർജിച്ചതും ബംഗാൾ ഉൾക്കടലിലെ ചക്രവാത ചുഴിയും കാരണമാണ് വടക്കൻ ജില്ലകളിൽ അതിതീവ്ര മഴയ്ക്ക് സാധ്യത.
ജൂൺ 18 വരെ കേരളത്തിൽ മുഴുവൻ അതിശക്തമായ മഴയ്ക്ക് സാധ്യതയുണ്ട്. അതിനുശേഷവും കാലവർഷം സജീവമാണ്. ബംഗാൾ ഉൾക്കടലിൽ രൂപംകൊള്ളുന്ന ചക്രവാത ചുഴി ഇന്ത്യയുടെ പടിഞ്ഞാറൻ തീരത്തേക്ക് നീങ്ങും. ഇതിൻ്റെ പ്രഭാവത്തിൽ തമിഴ്നാട്, കേരളം, കർണാടക സംസ്ഥാനങ്ങളിൽ മഴ ലഭിക്കും.
