കൊല്ലം നെല്ല്യാടി മേപ്പയ്യൂര് റോഡ് വികസനത്തിന് ആവശ്യമായ സ്ഥലമേറ്റടുക്കലിന് ഗസറ്റ് വജ്ഞാപനമിറങ്ങി. കൊയിലാണ്ടി താലൂക്കില് വിയ്യൂര്, കീഴരിയൂര്, കൊഴുക്കല്ലൂര്, മേപ്പയ്യൂര് വില്ലേജുകള്ക്ക് കീഴില് വരുന്ന 1.8852 ഹെക്ടര് ഭൂമിയാണ് ഏറ്റെടുക്കുന്നത്. വിയ്യൂര് വില്ലേജില് 0.8431 ഹെക്ടറും കൊഴുക്കല്ലൂര് വില്ലേജില് 0.5149 ഹെക്ടറും കീഴരിയൂര് വില്ലേജില് 0.3404 ഹെക്ടറും മേപ്പയ്യൂര് വില്ലേജില് 0.1868 ഹെക്ടറും സ്ഥലമാണ് പൊന്നുംവില നടപടി ക്രമങ്ങള് പ്രകാരം ഏറ്റെടുക്കുക. ഒരു വീട് പൂര്ണമായും 25 വീടുകള്ക്ക് ഭാഗികമായും നഷ്ടമുണ്ടാകും.
2016- സംസ്ഥാന ബജറ്റില് പത്ത് കോടി രൂപ നീക്കിവെച്ച പദ്ധതിയാണിത്. കൂടുതല് തുക ആവശ്യമായി വന്നതോടെ കിഫ്ബി പദ്ധതിയില് ഉള്പ്പെടുത്തി 2020-ല് 38.95 കോടി രൂപയുടെ ധനകാര്യാനുമതി നല്കി. സ്ഥലമേറ്റെടുക്കലിനായി 5.9 കോടി രൂപയും അനുവദിച്ചിരുന്നു. 9.59 കിലോമീറ്റര് ദൂരത്തിലും ഏഴ് മീറ്റര് വീതിയിലും നിലവിലെ റോഡ് പുനര്നിര്മ്മിക്കാനാണ് പദ്ധതി. ഡ്രൈനേജുമുള്പ്പടെ 10 മീറ്റര് വീതിയുണ്ടാകും. ഇത്രയും വീതിയില്ലാത്ത ഭാഗത്താണ് സ്ഥലം ഏറ്റെടുക്കുന്നത്. ബി.എം. ആന്റ് ബി.സി. നിലവാരത്തിലുള്ള ടാറിംഗുമുണ്ടാകും.
റോഡിലുള്ള വെള്ളക്കെട്ടുകള് പരിഹരിക്കാനും അപകടകരമായ വളവുകളും കയറ്റങ്ങളും ഒഴിവാക്കാനും പുനനിര്മ്മാണത്തില് ഫണ്ട് വകയിരുത്തിയിട്ടുണ്ട്. ജല അതോറിട്ടി, ടെലിഫോണ്സ്, കെ.എസ്.ഇ.ബി. എന്നീ വകുപ്പുകള്ക്ക് ഭാവിയില് റോഡ് വെട്ടിപൊളിക്കാതെ പൈപ്പുകളും കേബിളുകളും ഇടുന്നതിനുമുള്ള സംവിധാനവും ഒരുക്കും. പ്രധാന കവലകളില് നടപ്പാതകളില് ടൈല്സ് പതിച്ച് ഹാന്ഡ് റയില് ഘടിപ്പിക്കും.
