പ്രവേശന ദിനത്തിൽ പൊതു ബോധവൽക്കരണ പദ്ധതിയുടെ ഭാഗമായി കൊയിലാണ്ടി മർക്കസ് പബ്ലിക് സ്കൂൾ വിദ്യാർത്ഥികൾ തയ്യാറാക്കിയത് 25 മാഗസിനുകൾ. ലഹരി വിരുദ്ധ സന്ദേശം, പൊതുഗതാഗത നിയമങ്ങളുടെ പാലനം, ആരോഗ്യകരമായ ശീലങ്ങൾ, ഡിജിറ്റൽ അച്ചടക്കം, ശുചിത്വം തുടങ്ങി വിദ്യാലയങ്ങളിൽ ബോധവൽക്കരണത്തിന് സർക്കാർ നിർദേശിച്ച വിഷയങ്ങളിൽ ഊന്നിയാണ് വിദ്യാർത്ഥികൾ മാഗസിനുകൾ തയ്യാറാക്കിയത്.
കഥകൾ കവിതകൾ പോസ്റ്ററുകൾ ചിത്രകഥകൾ വിവരണങ്ങൾ ലേഖനങ്ങൾ തുടങ്ങി വിവിധ സാഹിത്യ രൂപങ്ങളിലൂടെ വിദ്യാലയത്തിലെ മുഴുവൻ വിദ്യാർത്ഥികളും സാമൂഹിക വിഷയങ്ങളിൽ ക്രിയാത്മകമായ മനോഭാവങ്ങൾ പ്രകടിപ്പിക്കുകയും അവ ശക്തിപ്പെടുത്തുകയും ചെയ്യുക എന്ന ചിന്തയിലാണ് ഇത്തരമൊരു പദ്ധതി അധ്യാപകർ നിർദ്ദേശിച്ചത് എന്ന് പ്രിൻസിപ്പൽ അബ്ദുൽ മജീദ് ഇർഫാനി പറഞ്ഞു.വ്യത്യസ്തതയും കലാ വൈഭവവും രചനാ ശേഷിയും പ്രകടമാക്കുന്ന 25 മാഗസിനുകളാണ് ക്ലാസ് അടിസ്ഥാനത്തിൽ വിദ്യാർത്ഥികൾ തയ്യാറാക്കിയത്.
പ്രശസ്ത എഴുത്തുകാരൻ നജീബ് മൂടാടി പ്രത്യേക ചടങ്ങിൽ മാഗസിനുകൾ പ്രകാശനം ചെയ്യും. പ്രവേശനോത്സവത്തിന്റെ ഭാഗമായി നവാഗതർക്ക് വർണാഭമായ സ്വീകരണം നൽകി. മർക്കസ് നോളജ് സിറ്റി ചീഫ് അഡ്മിനിസ്ട്രേറ്റീവ് ഓഫീസർ അഡ്വക്കറ്റ് തൻവീർ ഉമർ മുഖ്യാതിഥിയായി. സ്കൂൾ അഡ്മിനിസ്ട്രേറ്റീവ് ഓഫീസർ സി കെ അബ്ദുൽ നാസർ, പ്രിൻസിപ്പൽ അബ്ദുൽ മജീദ് ഇർഫാനി, മോറൽ ഡിപ്പാർട്ട്മെൻറ് ഹെഡ് അബ്ദുൽ കരീം നിസാമി എന്നിവർ സംസാരിച്ചു.
